عملية جراحية
كل العايشين بالسويد يعرف كلش زين انه مواعيد المستشفيات ينرادلها خلق كلش كبير , يعني اذا يقولولك راح ندز لك بعد شهر هذا معناتها أنك لازم تكون مستعد تنتظر على الأقل 6 أشهر بالقليلة ,والواحد ما يديروله بال الا اذا وصل مرحلة الموت بهذيج الساعة ممكن يجيبوله سيارة الاسعاف وياها سيارة دفن الموتى !!!
والكل يعرف محسوبكم أبو علي عنده خشم كلش كبير وينطبق عليه الأغنية اللي تقول (حبيبي نص وجهه خشم) , الله وكيلكم مو خشم هذا عبالك طفل ملزكينه بوجهي, وبما أن الخشم كبير فهذا يدعو انه يكون فيه عيوب , وأول هاي العيوب هو انحراف في أحد الدرابين , يعني السحب من الجهة اليسرى مو مثل السحب من الجهة اليمنى .
طبعا صرت أعاني من هاي المشكلة خاصة عند النوم لأنه النفس يصير صعب ناهيكم انه الشخير يصير ماله والي وتوصل ألحانه للجيران , فقررت في يوم من الايام أنه أروح للطبيب علمود أشكيله المشكلة ومثل ما تعرفون انه قبل ما أقابل الطبيب لازم أقابل الممرضة المسؤولة علمود تنقل الصورة كاملة للطبيب لما يصير الموعد عنده , وطبعا بعد طلعة الروح حصلنا على موعد عند الممرضة وهناك سألتني : شنو المشكلة ؟ قلتلها : النفس صعب ومو جاي أعرف أتنفس .
قالت : أحد ضاربك عليها ؟ يعني ماكل كتلة وأحد خامطك بوكس على خشمك ؟
قلت بنفسي : تخسين يا مرة .. أحد يكدر يضربني ؟
قالت : تتعاطى أو تشم مخدرات ؟
قلت وية نفسي : ألا يا سخيفة بنت السخيفة .. هو هذا وجه واحد مال مخدرات ؟
قالت : تلعب هواية بخشمك ؟
بيني وبينكم لما يضايقني شي صدك أكوم ألعب بخشمي .. لا تضحكون ترى كلكم تلعبون بخشمكم لما يضايقكم شي ومافي داعي تنكرون هذا الشي , ويمكن هاي الممرضة هي أول وحدة تلعب بخشمها وبايعة نزاكة علينا .
المهم آني انفجرت على الممرضة وقلتلها : الله يخليك مهما تكون الأسباب هسة دي فحصي هالخشيم وشوفي شكو بيه .
والله المرة ما قصرت جابت ملقط وصارت تقلب بهالخشم وكل شوية تقول : أهاااااااا .. أهاااااااا !!!
هسة دي فهمينا شنو يعني أهااااااااا ؟ شنو شفتي جوة ؟ فيه بترول مثلا ؟ لو منجم فحم ؟
ما أطول عليكم .. المرة ما أعرف شنو كتبت بالكمبيوتر وبعدين قالتلي : آني راح أدز الحالة للدكتور وهو يسوي اللازم وياك ... مع السلامة !!!
طبعا انتظرت 4 أشهر الى أن اجة موعد الدكتور .. هناك استقبلني الدكتور بابتسامة عريضة مثل اللي دا يهنيء واحد معرس بيوم زفافه .. قلت الحمدلله الدكتور مادامه راضي علينا معناتها الشغلة بسيطة .. وداخل غرفة الفحص :
الدكتور : ها .. شنو المشكلة ؟
قلت : ليش أنت ما تعرف ؟
قال : يستحسن تشرح لي أنت !!!
والله شرحت للدكتور من الأول .. والدكتور ما قصر فحصني نفس الفحص اللي فحصتني الممرضة , وقال : أهااااااااا .. أهااااااااااا .. أنا راح أدزك على طبيب مختص في المستشفى الكبير علمود يسويلك عملية جراحية .. ترى عندك انحراف !!!
قلت : ليش مو أنت الدكتور اللي يسوي العملية ؟ ترى الشغلة ما تستاهل هي عملية حسب معلوماتي كلش بسيطة .
الدكتور ما قصر دز أوراقي للمستشفى الكبير وبعد طلعة الروح وراها بسنة دزولي المستشفى على موعد .. الحمدلله أخيرا تذكروني .. هذا يعني انه الجماعة جايين يشتغلون ومو ناسيني .
طبعا قبل ما أقابل الدكتور كان لازم تقابلني الممرضة المسؤولة .. والله وكيلكم نفس الفيلم في البداية تسألني شنو المشكلة وبعدها تفحصني نفس الفحص وبالأخير تقول : أهاااااااا !!!
وصرت من دكتور لدكتور ومن موعد لموعد ومرات ينسوني وأروح دايما أذكرهم وكل مرة يقولون أنت في الطابور .. اللي طابور الحصة التموينية أهون منه بألف مرة !!!
ما أطول عليكم .. بعد سنتين ونص اجاني موعد العملية وطبعا كانت هناك بعض التعليمات ومن ضمن هاي التعليمات هي اني أجيب وياية ملابس وحاجياتي الخاصة .. آني قلت انه المسألة فيها تبياتة مادام الجماعة يقولون جيب ملابسك وياك .
طبعا آني صرت جاهز هسة لموعد العملية وكل من عنده حاجة وياية صرت أؤجلها لأني راح أبات في المستشفى وباليوم اللاخ راح أخرج تعبان من أثرها .
بيوم العملية جهزت نفسي وخليت ملابسي بجنطة صغيرة ورتبت نفسي واشتريت عصير وشوية بسكت وشوية كيك لأني في المستشفى راح أموت من الجوع وبالليل محد راح يسألني اذا آني جوعان لو لا , وقبل ما أطلع من البيت وصيت زوجتي على الجهال وقلتلها على سبيل الضحك : اذا متت سووا الفاتحة مالتي بشارع السنتر (دروتنينغ غاتان) قرب البنك السويدي بلكن البنك يحن علينا ويتكفل بجميع مصاريف الفاتحة !!!
هو آني قلتها لو ابتلشت على عمري لأن زوجتي بدل ما تضحك على النكتة أخذت المسألة صدك وصارت تبجي .. عبالك هسة رايح للجبهة مو للمستشفى وصارت جاراتنا أم محمد وأم مروان يهدون بيها وأم محمد تقول لزوجتي : لا تخافين على أبو علي .. ترى راح يرجع لك وخشمه صاير مثل لوز البحرين !!!
وبدل ما جاراتنا يهدوها لزوجتي صاروا يبجون وياها , آني ما تحملت المنظر وهربت من البيت ورحت للمستشفى وهناك الجماعة ما قصروا أخذوا مني 300 كرونة وحولوني كبل على غرفة العمليات وهناك كان الدكتور بانتظاري , بس خفت لا يسألني همينة : شنو المشكلة ؟ السؤال المعتاد اللي كل الدكاترة اللي قابلوني يسألوني إياه !!!
العملية كانت كلش بسيطة يمكن استغرقت ربع ساعة بس .. وبعدها حشكوا شوية قطن بخشمي وقال الدكتور : خلصنا !!!
الله ياخذك .. مخليني سنتين ونص أنتظر علمود بس هاي العملية ؟ لو أدري هيج جان من زمان سويتها بسوريا وفظيتها .
المهم انه بعد العملية قال الدكتور للممرض بأن يوصلني , آني قلت وية نفسي : خاف الجماعة يريدون يخلوني أبات الليلة بغرقة مشتركة .. ترى راح أرفض واذا صمموا راح أقلبها عليهم , بس الشي الحلو انه هسة هو وقت الغدا أكيد راح يجيبولي لحم خنزير وآني طبعا راح أرفض وراح أطلب لحم سمك ستيك .. ترى السمك عدهم كلش طيب وطبعا آني جايب عصير وياية راح تصير لعبتها , وما أخفي عليكم انه جايب وياية مناظر طبية علمود التلفزيون .. صحيح برامجهم سخيفة بس مو مشكلة أحيانا يعرضون على القناة الثالثة خوش أفلام !!!
الممرض صار يمشي وياية من داعوس لداعوس الى أن وصل لباب وهناك قال لي : مع السلامة !!! ولك مع السلامة شنو ؟ ألا يا مضروب الجلوة .. هذا موصلني للباب الخارجي .. ولكم هاي غير طردة .. الجماعة فوق ما همة مخليني أنتظر في الطابور سنتين ونص وبدل ما يعتذرون من عندي ضربوني بوري ترس وطردوني , والمشكلة ما أعرف ليش لعد كاتبين في استدعاء العملية جيب ملابسك وياك ؟
رجعت للبيت وهناك زوجتي لما شافت خشمي صاير كبير من حشك القطن بيه قالت : أشو خشمك ما صار لوز البحرين ؟
قلت : يظهر الجماعة التبس عليهم الأمر وبدل ما يركبولي لوز البحرين خللولي عرموط الإمارات !!!
نشمي
