عراقيون فوق القمر (الفصل الثاني)

عراقيــــون فـــوق القمــــر ـ 2

(الفصل الثاني)

المركبة هتشكوك7 لازالت في طريقها للقمر والمسافرين كلهم كاعدين بأماكنهم .. وجماعتنا العراقيين انتهوا من أكل الدولمة بس ظل شي واحد وهو فد استكانة جاي تعدل الراس بعد ما الدولمة سطرت روسهم .. المضيفة تمر على المسافرين نفر نفر وتشوف شنو يشربون ..

أبو لقاء : لو سمحتي فد استكانة جاي ..

جاسم الأعور : رحمة لوالديج من راس القوري ..

المضيفة : اشلون يعني من راس القوري ؟

صبرية : عيني يعني جاي زنكين..

المضيفة : جاي سنكين شنو ؟

تحسين : يعني نريده جاااااي مو شاااااي .. جاي عراقي ثقيل يعدل الطاسة لأنه مبين الرحلة مالتكم طويلة واحنا ناوين نشرب جاي ونلف روسنا وننام

المضيفة جابت الجاي وانطت لكل واحد كوب جاي ..

تحسين بصوت واطي : ألا يا مضروبة الجلوة هو هذا جاي لو بول تيس ؟

وحدة من الحريم الأجنبيات اللي مسافرات بنفس الرحلة : أوووووووف سوفاج شنو هاي ريحة الدولمة انتشرت بالمركبة ؟

مسافرة أجنبية لخة : أوووووي .. أنا سافرت هواية بس عمري ما شفت هيجي ناس مو متحضرين ومخربطين هواية .. أووي أووي

مسافرة أجنبية ثالثة : ريحة أكلهم تكتل مال أكل كلش شعبي .. ويخنق .. أنا لازم أروح لدكتور نفساني لأنهم عقدوني بهالريحة..

مسافرة أجنبية رابعة تقول لزوجها : أنا بعد ما أسافر بهاي الخطوط اذا هذولة العراقيين يسافرون بيها..

رحيم صار كل شوية يتريع وتحسين لزمته أم العرافي والمضيفة ما اتحملت الوضعية واغمي عليها ..بعد عشرين ساعة ضوئية .. قائد المركبة يقول : أعزائي المسافرين أرجو ربط الأحزمة سوف نصل بعد قليل الى مطار شمال القمر .. خاف فيكم أكراد ترى هذا شمال القمر خومو تحسبوه كردستان ..

نزلت المركبة في المطار .. وأبو لقاء يقول لجماعته العراقيين .. ها .. جاهزين ؟ شكيتو جوازاتكم ؟ ترى اللي عنده جواز سفر ممكن يرجعوه وما يقبلوه كلاجيء.. فاهمين شنو تقولون ؟ خاف يسألوكم عدكم فلوس قولوا لا علمود يصرفولكم معاش .. واذا سألوكم عن القجقجي قولوا ما نعرفه وانطوا مواصفات فد واحد وهمي خومو تورطونا ؟.. افتهمتوا لو أعيد عليكم ؟

نزل جميع المسافرين من المركبة وبما فيهم العراقيين وهناك ضابط الجوازات قال : العراقيين اللي يريدون يقدمون لجوء يجون على اليسار وباقي المسافرين يروحون يخرجون من الجوازات ..

استغرب ضابط الجوازات لما شاف كل المسافرين اجوا على اليسار ومحد راح يخرج من الجوازات ..

ضابط الجوازات : معقولة ؟ المركبة كلها عراقيين ؟

وزاد استغراب الضابط لما شاف الأجانب اللي لابسين كشخة اتضح انهم عراقيين ..

رحيم : لعد هذولة اللي حسبناهم أجنبيات ويقولون أوووي و أووووف وصاروا يفيكون براسنا طلعوا همينة عراقيات ؟

تحسين : لعد شوف وراك ترى المضيفات وقائد المركبة همينة طلعواعراقيين وجايين يطلبون لجوء

أبو لقاء : بس شي واحد أريد أعرفه .. اذا هذولة كلهم عراقيين وجايين يطلبون لجوء بالقمر لعد منو بقى بالعراق ؟؟؟

(نكمل معكم في الحلقة القادمة )