فوق سطوح البصرة

فوق سطوح البصرة

المكان : في البصرة بالتحديد فوق سطوح آخر بنايتين بالبصرة !!!

أبطال المسرحية

1ـ الفنان الحقير الكبير .. المالكي

2ـ الفنان الصاعد على جثث العراقيين .. مقتدى

3ـ بالاشتراك مع الوجه الجديد .. قاسم عطا .. بدور العريف الفاشل

4ـ بالاشتراك مع نخبة جديدة من الحرامية وقطاع الطرق و المجرمين والمكبسلين

كنا قبل نغني على البصرة ونقول : الله الله شحلات العمر يا كمرة .. والشوق كل الشوق للبصرة .. وكنا نغني : بصرة وعينه مكحلة .. وكنا همينة نغني : كلنا ولاد البصرة !!! ترى مو علمود آني بصراوي أمدح بالبصرة .. لا والله بس لأن البصرة الها مكانة بقلب كل عراقي ويكفيها فخر انها كانت مدينة صامدة في وجه الفرس المجوس خلال القادسية الثانية .. بس هسة للأسف صارت خرابة ومرتع للحرامية والعيشة بيها صارت مملة بفضل أصحاب العمايم السودة .. وبفضل اللي اجوا على ظهر الدبابات الأمريكية وبفضل همينة اخواننا العرب اللي تآمروا على العراق وخلوا أراضيهم تنطلق منها الطيارات الأمريكية علمود تهد بيوت العراقيين على روسهم وتذبح أطفالهم وترمل حريمهم !!!

طبعا بوسط هذا الدمار كله ظلت بالبصرة بس بنايتين ما حاشها التخريب .. ايه بس بنايتين ..البناية الأولى رغم التصدع اللي بيها يسكنها المجلس الأعلى للثورة الايرانية جماعة حزب الدعوة يساندهم الحرس الوطني العراقي .. وعلى بعد 200 متر تلاكون البناية الثانية رغم الشرخ الكبير اللي يشق البناية من أعلاها لأسفلها يسكنها الصدريين جماعة جيش المهدي .. طبعا الكل متأهب والكل مستنفر وسيد مقتدى مخلي جماعته يراقبون الوضعية من بعيد وفوق العمارة كاعد واحد من جيش المهدي (مكبسل) يراقب الوضعية من أعلى نقطة في البناية وهذا الشخص مختاره شخصيا السيد مقتدى كمراقب درجة أولى لأن المكبسل أحيانا ما يخطأ الهدف ويظل مركز على نقطة وحدة وما يتحرك من مكانه .. ويقولون انه يعرف كل البزازين اللي بالمنطقة وما يعبر عليه بزون غريب ويعرف ياهو ولاءه للصدريين وياهو من جماعة قوات بدر .. يعني خبير بزازين !!!

أما البناية اللخة وهي بناية قوات بدر والحرس الوطني فكان المالكي مسويله ساتر من الكواني المتروسة تراب وجاي متحصن بيه بفوق السطح وكان ماسك الدربيل وجاي يراقب بناية مقتدى .. وعلمود يظهر المالكي بدور القائد العظيم لبس ملابس الحرس الوطني وخلى على قميصه (نياشين) اشتراها من سوق مريدي ببغداد وصار يفيك بروس جماعة الحرس الوطني .. وصار يمسك التلفون ويكلم القادة ويشجعهم على مواصلة تقدمهم بالبصرة ( يقلد الشهيد صدام حسين أثناء حربه مع ايران ) !!!

المالكي من أعلى البناية بصوت عالي : مقتدى ! وينك شنو خايف على نفسك ومو جاي تسترجي تطلع؟ .. ترى جايب وياية (صولة الفرسان) اللي راح ينتفون ريشك تنتف !!!

مقتدى كان بسرداب بنايته وجاي يلعب بلاي ستيشن ومخلي لعبة قتال حتى الموت لأن السيد يستحرم يخلي لعب طوبة لأنها بنظره حرام كونها تضييع وقت !

بس هنا السيد لما سمع صوت المالكي وهو يناديه ويتحداه ما تحمل وشمر اليدة مالت البلاي ستيشن على واحد من جماعته وقاله : خلي بالك مو تخلي اللاعب الأمريكي يغلب الايراني .. أنا راح أشوف هالأرعن المالكي وأجي أكمل اللعبة !!!

مقتدى بعد ما صعد على سطح البناية وبصوت عالي : حبيبي .. انت جاي ومحسب جيش المهدي راح يسكتلك مو أخلي أصغر حرامي عندي يأدب أكبر زمال عندك !

المالكي يقول لقاسم عطا : ترى هذا يقصدك .. رد عليه !

قاسم عطا : ما ترد عليه انت شنو آني زمال مال اللي خلفوك وبعدين كلمة زمال همينة تنطبق عليك سيدي !

المالكي : مقتدى عندك مهلة 72 ساعة علمود تسلم أسلحة جماعتك .. مو تقول ما قلت !

مقتدى ( يعفط بكل قوة ) : حبيبي .. شنو شايفني زوج ؟ آني اللي أقوللك اسحب قواتك وروح لأهلك ترى الأسلحة مالتي ايرانية متطورة والله يخلي أستاذي حسن نصر الله اللي درب جيشي وخلاه جيش كلش قوي مزود بأحدث التقنيات صحيح جيش المهدي غالبيتهم حشاشين ومكبسلين بس ترى حبيبي حشيشتنا ايرانية ومو مغشوشة مثل مالت جماعتكم .. ومو بعيدة ايران تدزلنا سلاح نووي ونضرب المنطقة الخضراء .

المالكي : شنو هي كوترة ؟ انت تحسب ان الأمريكان راح يسكتولك ترى راح يقصفوكم بالطيارات ترى يقولون ان عدهم قنبلة خاصة للمعممين .

مقتدى : العب غيرها .. آني أمس تكلمت وية السفير الأمريكي وقال احنا ما نتدخل هذا أمر داخلي .. انتو ولاد متعة مثل بعض والشغلة بيناتكم !!!

المالكي : ولك انت فد واحد ما تستحي انت عميل ايراني تاخذ أسلحة من ايران وجاي تسوي نفسك وطني !

مقتدى : شوف منو يحجي ؟ حبيبي .. اذا أنا عميل ايراني فأنت مختوم على صلعتك صنع في ايران .. شنو نسيت ان حزب الدعوة هو بالأصل فارسي وانك كنت تعذب الأسرى العراقيين بايران .. حبيبي لو تقول حجي مثل الناس لو تسكت وتاكل خبز أحسن لك ترى اذا آني عميل فارسي فأنت عميل فارسي وأمريكي وصهيوني !!!

المالكي : شنو تعايرني اني كنت أقتل العراقيين ؟ مو هذولة كانوا صداميين وتكفيريين .. خو انت همينة قتلت هواية عراقيين ودريلاتك تشهد عليك !!!

مقتدى : اللي يسمعك يقول مو انت وكيل هالدريلات .. عالأقل احنا هسة ناس وطنيين .. ومقاومين و..

المالكي : وحرامية وعركجية ومكبسلين وولاد شوارع .. شوف آني راح أدزلك المغوار قاسم عطا علمود يتفاوض وياك ..

العريف قاسم عطا : شنو انت تحجي بكيفك ؟ آني جماعة مقتدى هذولة لا يمكن أنزل نفسي الهم .. هذيج المرة رحت أتفاوض وياهم باكو ساعتي ومحفظتي وبعدما رجعت البيت اكتشفت انهم بايكين فانيلتي .. لعد هالمرة اذا أروحلهم شراح يبوكون ؟!!!

المالكي : ايه والله آني هذيج المرة باكو مني فردة قندرة وفردة جواريب ولوما المستحى جان قلتلك شنو اكتشفت مبيوك مني لما رحت للخلاء .. هذولة حرامية وسرسرية تكة ماكو ..

(مقتدى يشمر حجر من فوق بنايته وتوصل ترس على عين المالكي )

المالكي : آآآآآآآآآآآي .. ولك ملعون الوالدين .. شنو قناص؟ .. احنا مو كافي الصداميين والتكفيريين والارهابيين جاي يقنصون بجماعتنا .. تجي تطلعلي انت همينة .. طركاعة وابتليت بيها ؟؟؟!!!

العريف قاسم عطا : سيدي هاي كلينكساية علمود تمسح بيها الدم الجاي ينزف من عينك .. صحيح آني مخطت بيها بس أحسن من ماكو ..

مقتدى : ملوكي .. عندك مهلة علمود تسحب قواتك من البصرة وتلطع بكرامتك والا ترى الحجر اللاخ راح يطير عينك اللخة !!!

العريف قاسم عطا : سيدي آني أقول انه نسحب قواتنا من البصرة ونرجع بغداد أحسن من ما يجي هذا الزعطوط ويمسح بكرامتنا الأرض ترى لا الجيش يتحمل ولا سمعتك كدام العالم تتحمل وانت مو ناقص فضايح كافي انك رئيس وزراء فاشل والناس شايلة بقلوبها عليك والشغلة ما تتحمل لأن جيشنا الجرار صار هو يبيع أسلحته لجيش المهدي و ...

المالكي : كافي .. لعد اصدر بيان الانسحاب واعلان النصر على جيش الزعطوط مقتدى وخليه انسحاب باقتدار وقوة واصدر بيان بقناة الفرات والعراقية والفيحاء انه احنا نريد نحقن الدماء .. نفذ !!!

العريف قاسم عطا : علم سيدي .. والتاريخ راح يشهدلك هالنصر العظيم !!!