رقوبي في ضيافة المخابرات السويدية
(الفصل الرابع والأخير)
مشى رقوبي لمركز الشرطة بخطوات كلش ثقيلة وقبل ما يدخل المركز قرر انه يدخل على ساس انه مو خايف وانه دا يستمع للهيدفون وانه دا يرقص على نغماته فصار يعلي صوته علمود يلفت النظر ويردد وية الأغنية : أها أها أها .. هلا هلا هلا .. مع بزخ عراقي مال أهل الثورة !!!
موظفة الاستقبال : هلوووووووو .. أنت وين محسب نفسك داخل جوة ديسكو لو مركز شرطة ؟؟؟!!!
رقوبي سوى نفسه مو سامع لأنه منسجم وية الدكة الى أن اصطدم برجال سويدي ضخم وقال : أنت عبد الرقيب خالد السامرائي ؟؟؟
رقوبي انجر بوشه لأن الرجال ضخم بشكل واضح ، وقبل ما رقوبي يرد اتذكر نصيحة البقال الايراني بأن يغير اسمه ..
رقوبي : لا آني اسمي ركوبي كاللي سفينسون .. من هنا ورايح هذا اسمي !!!
الموظف : آني مايكل من المخابرات السويدية !
ومد ايده علمود يسلم وهناك رقوبي جر ايد الموظف وباسها !!!
الموظف : تعال وراية علمود نكعد بغرفة التحقيق وهناك نتكلم وية بعض .
رقوبي صار يمشي ورا الموظف من دهلوس لدهلوس الى أن وصلوا غرفة فيها شخصين واحد سويدي وواحد مترجم عراقي .. وطبعا رقوبي سلم على السويدي وهمينة باس ايده بس للمترجم سلم عليه من ورا خشمه !!!
الموظف الاول : أنت تعرف ليش أنت هنا ؟
رقوبي : لا والله بس أكيد أنتو دازيلي غلط ترى مو آني الشخص المطلوب .. يمكن هذا عمي أبو زياد؟؟؟
الموظف : مو أنت عبد الرقيب خالد السامرائي الملقب بـ (رقوبي تك باب)
رقوبي : ايه هذا هو آني ..
الموظف : وأخيرا وكعت بايدينا يا رقوبي .. احنا صارلنا سنين دايخين عليك !!!
رقوبي تذكر أن المجلة الخلاعية بايده وصار يهف عمدا على نفسه علمود يبعد أي تهمة عنه !!!
رقوبي : أشو حارة عدكم وانتو لا بنكة ولا تكييف يعني الا أهفي بهاي المجلة الخلاعية علمود تفهمون أن الدنيا حارة ؟؟؟!!!
الموظف : أهااااااااا .. أنت تقرأ مجلات خلاعية ؟
رقوبي : ايه والله ومن آني صغير أحب أباوع هاي المجلات لأنها تعكس ثقافة الشعوب اللخة و..
الموظف : أنت تعرف أنه اللي يقرأ هاي المجلات بالشارع علنا كدام الناس عليها سجن 3 أشهر ؟؟؟
رقوبي : لعد يلعن أبو اللي يقراها .. أصلا هي حرام عدنا وها أها .. و هاي شكيناها!!!
الموظف : كلت كلمة (حرام) شنو أنت مسلم متطرف ؟
رقوبي : حبيبي .. أصلا آني ما أعترف بشي اسمه اسلام .. آني مسلم بالهوية بس !!!
الموظف : أنت تريد تقنعنا أنك مو الشخص المطلوب وأنك مو عبد الرقيب المسؤول عن الجناح العسكري في القاعدة ؟؟؟!!!
رقوبي : يا معود يا قاعدة يا بطيخ أصلا آني أضوج منهم وما أحبهم وكل ما أشوفهم أبتعد عنهم ..
الموظف : أهاااااا .. يعني أنت تعرفهم وعندك علاقة بيهم ..
رقوبي : ومستعد أكتب أساميهم واحد واحد !!!
الموظف انطى رقوبي ورقة وقلم ورقوبي ما صدق على الله وكتب أسامي كل الناس اللي يعرفهم سواءا مسلمين لو مسيحيين لو أكراد لو حتى عبادين الشيطان حتى يقولون انه كتب اسم فؤاد السرياني البقال .. شنو علاقته هذا بالقاعدة ؟ ما أعرف ؟ حتى اسم وسام القمرجي صديقه الحميم كتب اسمه وما رحمه !!! والشيء المضحك انه كتب اسم صهيب ابن عبد القادر !!!
الموظف : هذا طفل اشلون تكتب اسمه وتنسبه للقاعدة ؟؟؟
رقوبي : ايه مو هذا لما يكبر راح ينضم الهم مبين من شكله !!!
الموظف : زين احنا راح نوريك صور كم شخص ونشوف تعرفهم لو لا ؟
"الصورة الأولى كانت لسيد حشيمة وهو جاي يضرب ابنه أحمد "
رقوبي : هذا سيد حشيمة فد واحد حقنة .. متزوج يمكن ميتين مرة وهسة جاي يوري القهر مال الزواج مالته على ابنه !!!
"الصورة الثانية لعبد القادر وهو جاي يأذن "
رقوبي : هذا أبو صهيب !!!
الموظف : شنو تعرف عنه ؟
رقوبي : كلش متشدد ومتعصب و يريد بس هو اليكول لما نلعب طوبة !!!
"الصورة الثالثة لحسن أبو علي وهو يبتسم "
رقوبي : ايه هذا أبو عليوي .. هواية يفيك براسي هسة هو قبل ما يتزوج كان يعرف وحدة ايرانية وهسة صاير أبو ركعة .. يا معود هاي ناس زبالة !!!
"الصورة الرابعة لأبو زياد وهو جاي يجر نفس جكارة "
رقوبي بصوت واطي : ايه هذا أبو زياد !!!
الموظف : يعني تعرفه زين ؟؟؟
رقوبي : والله معرفة سطحية !!!
الموظف : شنو هو مو عمك ؟
رقوبي : ايه بس من غير خالة .. هو صحيح عمي بس العلاقة البيناتنا مو هالكد .. هو دايما يرزل بية كدام العالم علمود أصلي بس آني مثل ما تعرفون مو أبو ركعة .. آني انطيني ديسكو لو مشروب أخليك على راسي .. تكوللي تعال صلي ما أشتريك بفلس !!!
الموظف : لعد هاي الصورة الخامسة شوفها زين وكوللنا شنو تعرف عنه !
"الصورة الخامسة لأحمد شيحان أبو مصطفى وهو جاي يلعب طوبة وكرشه طالعة برة نص متر"
رقوبي : هذا أبو مصطفى هسة هو مسجون عند الأمريكان في العراق .
الموظف : يعني تعرفه ؟؟؟!!!
رقوبي يقول وية نفسه : هاي شورطني وكلت أعرفه ؟
رقوبي : شفته بالتلفزيون !!!
الموظف : يعني مو بالجامع ؟؟؟
رقوبي : يا جامع أصلا آني ما أروح الجامع رحتله مرة وحدة بحياتي وندمت لأن الجماعة هناك طلعوا متخلفين لا يروحون ديسكو ولا يشربون .. شنو هالحياة الجايفة العايشينها ؟
الموظف : زين آني راح أوريك صورة وأريد منك تعليق عليها ؟؟؟
"الصورة كانت لرقوبي وهو في الحج "
رقوبي : ايه هاي أيام الشقاوة هع هع هع هع !!!
الموظف : مبين من الصورة أنك كنت في الحج وهسة جاي تكوللي أنك تضوج من اللي يصلون ؟؟؟!!!
رقوبي : أصلا التذكرة مالتي كانت لتايلاند بس أشو بالغلط دخلت الطيارة الرايحة مكة وهذولة السعوديين ما يتفاهمون خاف تكوللهم رايح تايلاند يقيمون عليك الحد وتصير كتلتي عمل شعبي !!!
"رقوبي يقول بقلبه : من عزا بعينك أبو ايلاف الا تقنعني أروح الحج ؟؟؟!!!"
الموظف : زين أنت بالسعودية محد حاول يجندك ؟ ما دخلت مثلا بتنظيم معين يشجعك على الجهاد في سبيل الله ؟؟؟
رقوبي : والله لو سائلني شنو سويت بالحج جان كلتلك أنه قضيتها كلها نوم .. هي مرة وحدة شفنا بيها الكعبة وطكيت هالصورة بيها .. شنو ابتليت على عمري خوما ابتليت ؟؟؟
الموظف : زين خلينا بعيدين عن مكة وننتقل لنقطة أخرى .. أنت دخلت للسويد بتاريخ 11 سبتمبر 2001 .. مو شايف انها غريبة دخولك للسويد بهذا التاريخ بالذات ومبين خط سيرك جاي من السودان ؟؟؟
رقوبي : مو هذا حظي الفقر اللي خلاني أسمع كلام عمي وأجي بهالوكت !!!
الموظف : عمك تقصد أبو زياد ؟
رقوبي : يا عمي ؟ آني كلت كلمة عمي ؟ أصلا ما كلتها !!!
الموظف : يعني أنت ما الك علاقة باللي حصل في 11 سبتمبر ؟؟؟ يعني ما كنت طرف بيها ؟؟؟
رقوبي : أشو أنت بس تريد تورطني شوية وتكوللي أنت أبو مصعب الزرقاوي!!!
الموظف : أنت شنو رايك بالولايات المتحدة ؟
رقوبي : خوش ناس حررونا وخلونا نستعمل موبايلات ونشوف ستلايتات .. خلف الله عليهم !!!
الموظف : زين وشنو رايك باسرائيل ؟
رقوبي : آني أشوف ان اليهود ناس مسالمين .. هسة قحط دا خلوهم ياخذون فلسطين أشو احنا العرب عدنا كومة أراضي .. دنطوهم فلسطين وفظوها ؟
الموظف : بس الاسرائيليين دا يقتلون باخوانكم العرب الفلسطينيين وآني أستغرب منك أنك تدافع عنهم ؟
رقوبي : همة الفلسطينيين ما يجوزون همة اللي دايما يتحرشون باليهود وما يريدون يعيشون بسلام وياهم !!!
الموظف : زين يا رقوبي أنت كلت في البداية أنك تريد تغير اسمك .. هل أنت مستعد للتغيير ؟؟؟
رقوبي : طبعا ومن هسة .. حتى شوف هذا لباسي عليه قلوب حب حمرة وآني من هسة مستعد للتغيير !!!
الموظف : تكدر تروح هسة لدائرة الضرايب وتغير اسمك هناك ومبروك مقدما على تغيير الاسم !!!
رقوبي طار من الفرح وصار يبوس الموظف من خده ومن راسه وبايده وجه وكفا حتى نزل للقندرة وباسها !!!
الموظف : مع السلامة !!!
رقوبي : يعني أروح ؟؟؟
الموظف : بكل سرور !!!
رقوبي : طلع من المقابلة فرحان ويريد بس يوصل للبيت !!!
الموظف الثاني للموظف الأول : أشو باركتله .. تريد تصرفله الجنسية ؟
الموظف الأول : تعرف أنه قرار الجنسية كنت مجهزه لهالشخص بس بعد الكذب اللي طلع منه ما صار فيه مصداقية وهالشكولة ما تستاهل الجنسية السويدية لأنه اتصف بالانانية وهو حاول أنه يورط غيره بس علمود هو ينجي نفسه واحنا كسويديين ما نتحترم انسان يبيع مبادئه علمود بس يحصل على جنسية طبعا هذا غير أنه مغير شكله وصاير مثل الببغاء ومخليني ارتاب منه !!!
الموظف الثاني : وقرار الجنسية ؟
الموظف الأول : مثل ما شك المجلة الخلاعية راح أشك قرار الجنسية وخليه فد ثلاث لو أربع سنوات يتأدب وبعدين ننظر بأمره !!!
الموظف الثاني : وآني أؤيدك على هذا القرار .. بس تعرف حلوة هاي شكله صاير مثل الببغاء ههههههههه!!!
رقوبي طلع من مركز الشرطة وهناك شاف وسام بالطريق !!!
وسام : ها ؟ شسويت سبع لو ضبع ؟
رقوبي : طبعا سبع .. دوختهم وخليتهم فلس ما يسوون وباجر قرار الجنسية يجيني للبيت غصبن ما عليهم وهسة آني ما أريد أشوف خلقتك لأنك مو من مستواي
Javle svarts kalle!!!
أروح أغير اسمي أحسن ما أشوف هالخلق الزفرة !!!
وسام : الله يا زمن .. تاليتها رقوبي ياخذ جنسية ؟ يا هل ترى شنو سوى علمود يحصل عليها ؟ واذا آني سويت مثله ممكن احصل عليها ؟
ترى كل شي جايز بهالوكت !!!
مع تحيات نشمي
