في ربوع تايلاند

في ربوع تايلاند
المنظر في مطار الكويت الدولي ودانة وسلمان مستعدين للسفر لتايلاند وخال دانة حسن وأخوها محمد جايين يودعوهم في المطار .. طبعا دانة قبل ما تسافر حطت كيلوين بودرة على خدودها ونص كيلو ديرم على شفايفها وربع كيلو كحل على عيونها  لزوم السفر وسلمان شرب عصير الجوز الممزوج مع حليب سباع من كافتيريا المطار علشان ترفع معنويات السفر !!!
دانة ودعت أخوها محمد ومسحت كحل عيونها بدشداشة محمد .. ومحمد من بطت جبده وحزنه على فراق أخته قال لازم أروح للحلاق وأزين شعري .. دانة ودعت خالها حسن ومخطت على كم دشداشته وخالها حسن قال : حسبي الله ونعم الوكيل!!!
سلمان بجى بحرقة على فراق الكويت وبس دخل الطيارة صار يتغشمر وية دانة ويعيب عليها لأن دانة بعد ما نزلت دموعها على خدها بين نوع الكحل الماشي على وجهها وطلعت جنها محتفلة بعيد الهيلوين !!!
طارت الطيارة وبعد ساعة حس سلمان بالجوع وهناك طلب العشا  والمضيفة ما قصرت وجابتله جربوع بالمتبل مع شوية صراصير مقلية محشوة داخل ضفدع أحول و يتيم !!!
الرحلة من الكويت لتايلاند تستغرق وقت طويل وسلمان مو عارف اشلون يكسر حاجز الفراغ والملل خاصة وانه دانة كانت نايمة .. هناك طرت على بال سلمان فكرة انه يسوي مقلب بدانة كام فتح باب الطواريء مال الطيارة وحذف دانة هي وكرسيها من الطيارة وصار بعدين يسحب الكرسي بحبل كان رابطه فيه .. طبعا الهدف من هالشغلة انه يخوف دانة بس الشي الغريب انه بعد ما سحب دانة للطيارة هي والكرسي الكاعدة عليه اكتشف انه دانة بعدها نايمة و انها ما صحت من النوم .. هناك سلمان سد باب الطواريء وكأنه شي ما حصل .. فشلة ؟ مو ؟
سلمان صار يحوس في الطيارة وكل شوي يحاول يتكلم وية الناس بس محد معطيله وجه الا وحدة تايلندية كانت كاعدة بآخر كرسي في الطيارة وكانت تبتسم لسلمان .. وسلمان من فرحته بهالصيدة صار يطالع دانة بس دانة كانت بسابع نومة الأمر اللي شجع سلمان انه يروح للتايلندية ويكعد يمها ويطيحله سوالف .. يقولون انه سلمان بهذيج الساعة الضحكة كانت راح تشك حلكه من السوالف الحلوة ودار حديث شيق وحلو مابين التايلندية وسلمان :

 

سلمان : الللللللللله تعرفين انج حلوة واااااايد وشمحووووووووطة !!!
التايلندية : معقولة أنا حلوة ؟ تعرف انه أنت أول واحد يقوللي اني حلوة وايد !!!
سلمان : معقولة ؟ هالحلاوة هاذي كلها ومحد قاللج انج حلوة ؟
التايلندية : تصدق انه صاحبي ما كان يقوللي هالكلام !!!
سلمان : اسمحيلي أقوللج انه صاحبج هذا خبل وما عنده ذوق !!!
التايلندية : يعني اذا أقوللك بوسني راح تبوسني ؟
سلمان : شنو ؟ أبوسج ؟ أبوسج وأبوس أبوج وأبو أبوج بعد !!!
التايلندية : لا ما في داعي تبوس أبوي .. أبيك تبوسني بس أنا !!!
سلمان ما صدق خبر وصار يبوس بالتايلندية وركز على حلجها .. صحيح ريحة حلجها خايسة بس سلمان ما يطوف .. يظهر عليه محروم هالمسكين .. وبين ما سلمان يبوس شاف واحد من ربعه بالصدفة موجود في الطيارة واسمه (خضير) وجاي يتجه صوب  سلمان .. وسلمان من ضيقة خلقه تذكر بيت الشعر اللي يقول :
صديجي صديج .. بس شوفته بهذيج الساعة ضيج
خضير : كوة سلمان !!!
سلمان : اشتبي ؟ مو شايفني مشغول !!!
خضير : ايه بس أبي أقوللك شي !!!
سلمان : يا أخي وخر عني شنو ما عندك ذوق .. مو شايفني وية صيدة العمر ؟
خضير : شنو ما تبي تسمع شنو أبي أقوللك ؟
سلمان : ترى مصختها .. روح من هني لا ألعن أبو أسلافك !!!
خضير : ما دامك هالشكل خليك مخدوع كان بامكاني أخليك بس قلبي ما يطاوعني!
سلمان : يا ثقل دمك صج أنك حسود لما تشوفني وية وحدة حلوة جاي تتفلسف براسي!!!
خضير : تدري اشلون ؟ ترى هاذي اللي وياك مو حرمة .. تراها رجال جنوس وأنت جاي تمصمص بشفايفه !!!
سلمان : أنت جذاب أنت تبي تاخذها مني ، علشان هالشكل أنت تقول هالكلام !!!
خضير : اذا مو مصدقني افحصه !!!
سلمان مد ايده وفحص التايلندية واكتشف انه فعلا تايلندي مو تايلندية !!!
سلمان : الله ياخذك ومخليني من الصبح أبوس فيك أثاريك رجال مو مرة !!!
دانة طبت على غفلة على سلمان وهناك قالت : سلمان .. شنو تسوي هني ؟
سلمان : تصدقين يا دانة أول مرة في حياتي أشوف الدنيا في المقلوب !!!
دانة : شنو تقول؟ أنا مو فاهمة شي من كلامك .. يالا تعال واكعد بمكانك !!!
سلمان كام من مكانه وهناك شمت دانة ريحة حلج سلمان
دانة : سلمان .. ليش ريحة حلجك خايسة ؟؟؟
سلمان : والله ماكل شوربة لسان ضفدع جنوس وماكل وياه راس بصل !!!
دانة : وع .. ما اعرف اشلون أنت تحب هالأكلات الغريبة ؟؟؟
سلمان قال وية نفسه : الحمدلله ما عرفت شنو قصدي .. خخخخخخخخخخ !!!
وصلوا دانة وسلمان لتايلاند ومن الفرحة رقص سلمان ودانة رقصة تايلندية اسمها (التنين المنحاش) !!! 
أخذ سلمان ودانة تاكسي من المطار للفندق وقبل ما يركبون التاكسي اتفق سلمان ودانة انهم يعاملون راعي التاكسي وما يعطونه أجرة زايدة عن حقه علشان ما يسمحون لأحد انه يضحك عليهم وياكل فلوسهم ولما وصلوا للفندق طلب راعي التاكسي أجرة عشرين دولار فكام كل واحد منهم وطلع عشرين دولار وعطاها لراعي التاكسي .. يظهر الجماعة حيل مفتحين !!!
 

   المنظر الحين عند استقبال الفندق وسلمان يحاول يطلع الجوازات والفلوس :
سلمان : دانة .. وين جنطة الفلوس والجوازات ؟
دانة : والله ما أدري شنو هم مو عندك؟
سلمان : قبل شوي كانوا عندي بس ما اعرف وين صاروا !!!
دانة : شوفهم خاف بجيبك ؟
سلمان : جنطة بجيبي ؟ أنت من صجج ؟ شنو اشايفة جيبي ؟ خيشة عيش والا خيشة شكر علشان يستوعب جنطة ؟
دانة : عدالي شورتك هذا مع الجيب اللي فيه   جنه شورت شارلي شابلن .. مو هو هذا شورتك نفسه اللي كنت تجمع فيه القرقيعان من قبل 3 سنوات ؟
سلمان : بل بل بل بل بل هاذي ما تنسى .. ما شاالله عليج تتذكرين كل شي مع اني مغير شوي بتطريز الشورت  .. بس تعرفون زين ما تذكرت انه هو نفس الشورت اللي قمت أصيد الجرابيع فيه لما طلعنا للبر هع هع هع هع !!!
دانة : الحين اشلون ترى موظف استقبال الفندق يبي فلوس الغرفة ؟
سلمان : قوليله انه عندي ربع دينار من ايام الشيخ عبدالله السالم اذا يبيه ترى يساوي هالأيام عشر دنانير .. بس لو اعرف اشلون هالكلب راعي التاكسي كدر يبوك الجنطة من عندنا ؟ والله قهر !!!
دانة : والحين اشلون ؟ وين ننام ؟ شنو ناكل ؟ وين أسوي شعري وعند أي صالون؟
سلمان : اذا مسألة شعرج بسيطة ترى أعرف حلاق مكانه تحت الجسر يحلق الشعر سفري ويسويج أحلى قرعة بتايلاند هع هع هع هع !!!
 

دانة : يا ثقل دمك !!!
مشت دانة مع سلمان بشوارع بانكوك محتارين وين يروحون لأنه ماعندهم فلوس وفجأة فكروا انهم يروحون للسفارة الكويتية ولما وصلوا هناك لكوا يافطة مكتوب عليها السفارة مغلقة للصلاة !!!
سلمان : يعني ما يصلون الا لما نكون احنا محتاجينهم ؟
دانة : خلينا ننتظر ليما يجون من الصلاة !!!
انتظر سلمان ودانة كدام السفارة لمدة يومين بس محد من السفارة اجة وصاروا كل ما يجون للسفارة يلاكون مكتوب عليها (مغلق للصلاة) !!!
 

دانة : يظهر ماكو فايدة يظهر انه الجماعة كعد يصلون صلاة تراويح وما راح يخلصون منها الا السنة الجاية .. أحسن شي نروح من هني ونشوف شنو راح نسوي !!!
مشى سلمان ودانة بالليل بشوارع بانكوك المخيفة وكل شوي يطلع لهم عتوي يخوفهم !!!
سلمان : تعرفين يا دانة ؟ والله مشتهي آكل مخ شمبانزي معصور عليه عصير مصارين دودة القز مع معبوج سحالي !!!
دانة : بس سلمان لا تلوع كبدي .. أنا مشتهية شوربة تماسيح بنكهة مخاط الفيل وفيها عيون ضفادع بطعم خنفسة ميت زوجها بحادث نعال  !!!
سلمان : شوفي دانة احنا لازم نفكر بطريقة عملية علشان نرجع للكويت .. احنا لازم نعتمد على نفسنا ونشتغل ونجمع فلوس تذكرتين ترجعنا للكويت .
دانة : مو مشكلة أنا مستعدة أغسل صحون بأرقى مطعم .
سلمان : طا هاذي منو يرضى يشغل كويتيين عنده في تايلاند ؟ أصلا هم يبون يجون للكويت علشان يشتغلون !!!
دانة : عيل شنو نشتغل ؟
سلمان : احنا لازم نشتغل أعمال حرة !!!
دانة : تقصد تجارة ؟
سلمان : تقريبا .. أنا مستعد أبيع صراصير مقلية كدام الفندق !!!
 

دانة : أنا مستحيل أخلي ايدي في الصراصير !!!
سلمان : طبعا حبيبتي أنا أصلا ما أرضى انه أنك تخلين ايدج في الصراصير .. معقولة هالايدين الحلوة تمسك صراصير ؟ لا .. لا .. مستحيل .. أنت بس راح تبيعين عصاعص فيران يقولون الجهال هني يموتون عليها وشغلها حيل ماشي ..

وعلى فكرة أنا راح أكون على يمين الشارع وأنت راح تكونين على شمال الشارع علشان نحتكر السوق !!!
دانة : زين سلمان ؟ احنا اشكثر يبيلنا علشان نكدر نجمع فلوس التذاكر ؟
سلمان : مو وايد اذا بالسنة الميلادية أربعين سنة واذا بالسنة الهجرية يبيلنا خمسين سنة .. بس مو أكثر !!!
دانة : عيل تدري اشلون ؟ أنا راح أعد بالسنة الهندية يمكن تصير أسرع !!!
اشتغل سلمان ودانة ببيع الصراصير والعصاعص وما شاالله عليهم كدروا خلال خمسة وثلاثين سنة يجمعون فلوس التذاكر .. صحيح الجماعة صار عمرهم فوق الستين سنة بس هذا ما منع انه الجماعة عندهم أمل واصرار على النجاح وتحقيق الذات !!!
سلمان : أخيرا حبيبتي كدرنا نجمع فلوس التذاكر .. جهزي أغراضنا علشان نرجع للكويت !!!
 

بدت دانة تجمع الأغراض من البيت .. صحيح هم كانوا ساكنين في مركب بس هذا كان يعادل قصر عندهم لأن الحب تارس القصر عفوا المركب .. (زين ما غرق المركب) .. وما بين ما كانت دانة تجمع أغراض البيت عثرت على الجنطة اللي كان فيها الجوازات والفلوس اللي ضيعوها قبل خمسة وثلاثين سنة كانت محطوطة داخل جيب بجامة سلمان !!!
دانة : شلمان .. شلمان .. (طبعا دانة ما كانت تكدر تقول سلمان بالسين لأنها صايرة عجوزة ومن كثر ما كانت تتسلى بعصاعص الفيران طاحت سنونها ) .. شلمان شلمان .. شوف شنو لكيت ؟
سلمان : معقولة ؟ رجعها راعي التاكسي ؟ والله هالرجال عنده ضمير !!!
دانة : أي راعي تاكسي ؟ أنا لكيتها بجيب بجامتك البنفسيجة !!!
سلمان : الللللللللله وأكببببببببببر .. صج أنا مطفي أنا علشان محد يبوكها بهذيج الأيام خليتها بهالبجامة !!!
دانة : والحين نرجع للكويت ؟
سلمان : والله اذا تبين الصج قلبي ما يطاوعني أترك بانكوك !!!
دانة : وأنا هم نفس الشي اتعودت على الحياة هني لأنها متروسة حب وحنان و..
سلمان : وصراصير .. هع هع هع هع !!!
دانة : هاذي الصراصير اللي مو عاجبتك هي اللي بنت هالحب الكبير .. صحيح الحلاق اللي تحت الجسر خلى شعري تتغير تسريحته بس ترى مثل العسل على قلبي !!!
سلمان :  تقصدين مثل القمل على شعرج .. هع هع هع هع !!!
دانة : وعلشان هالشكل أنا قررت اني أكمل باقي عمري هني .. شنو بساط الفقر أحسن من عندنا ؟
سلمان : وعلشان خاطر عيونج أنا راح أشك الجوازات علشان نقضي باقي عمرنا هني .. ويلعن أبو الفقر .. أنت بس جهزي لي شيشة بطعم ضب توه صايدينه ومسفرينه من الكويت !!!
دانة : وعلشان أثبت لك اشكثر أنا أحبك راح أشيش وياك على عناد الحساد !!!
 

مع تحيات نشمي