قندرتين على الراس توجع

قندرتين على الراس توجع !!!

عالشوملي الشوملي ..

جيبوا قندرتي إلي

قندرة على راس بوش

واللخة عاللي ذبح هلي

قندرة شكت حلك العلج

وقندرة صارت تاج على راس المالكي

أوي أوي هلي

قبل كل شي نبدأ بهلهولة بمناسبة ترقية الرئيس الأمريكي بحصوله على جائزة القنادر الذهبية المقدمة من شركة باتا العراقية .. مبروك حبيبي بوش على زوج القنادر .. صحيح هي ما سوت لك عنجورة على راسك بس ملحوكة لأن العنجورة مودتها هالأيام بالقلوب , والحسرة والندم وخيبة الأمل لونها دارج هالأيام خاصة بالولايات المتحدة بتزايد عدد النعوش الأمريكية القادمة من العراق .. بس بيني وبينكم ترى والله بوش كاسر خاطري أشو من الشعب الأمريكي دا ياكل قنادر ومن الكونغرس الأمريكي هم دا ياكل قنادر واجة باراك وحشكله زوج قنادر بحلك بوش ودول العالم تتمنى تضرب راس بوش بالقنادر ناهيكم عن القنادر اللي دا ياكلها بوش من زوجته بكل مناسبة ومن غير مناسبة وفوك كل هذا كملها عليه البطل العراقي منتظر الزيدي بزوج قنادر جو أرض على راس بوش .. ما تكولولي راس بوش شيتحمل علمود يتحمل ؟ لو همينة لابس خوذة من حديد جان همينة الرجال داخ راسه من طنين القنادر!!!

آني من دوري أهني الشعب العراقي على بروز بطل استطاع انه يبرهن ان الاتفاقية الأمنية الأمريكية المشبوهة اللي يريدون يفرضوها على الشعب العراقي مصيرها انها تنضرب بالقنادر وانه بزوجين قنادر يكدر الشعب العراقي انه يلغي مثل هيجي اتفاقية وبزوجين قنادر اللخ يكدر الشعب العراقي يطرد القوات الأمريكية من العراق !!!العالم كله فرحان بضربة القنادر حتى جارتنا أم مصطفى اللي زوجها لهسة محجوز عند الأمريكان اجت عدنا وهي كلش فرحانة حتى انه حسبنا ان زوجها أبو مصطفى طلعوه من السجن بس الفرحة كانت كلش جبيرة وبناتي الصغيرات صارن يرقصن عبالك أبوهم تزوج مرة اللخ أما جارتنا أم مروان فكانت انسانة عصرية بكل معنى الكلمة فراحت سوت كيك وصارت توزع عالجيران بدل خبز العباس .. بس اللوتي جارنا أبو ليندا الجيران صادوه وهو لاف قنينة نجهل شنو جواها .. ودخل البيت علمود يحتفل وبعد ما طلع الا باليوم اللاخ وراسه كان يوجعه .. يمكن اللي كان جوة القنينة دوا مال راس لو مال غرغرة !!!

طبعا آني ما شفت عراقي أصيل ما عجبته الوضعية لأن زوج القنادر حركت القضية العراقية عند العراقيين وخلت العراقيين يكون عدهم دافع انهم يضربون بكل ما يملكون من قنادر بوش وشكولته الزفرة ، ولو آني أتوقع من حكومة المالكي انهم راح يمنعون بيع القنادر في العراق أو انهم يسوون حظر صنع القنادر في العراق خشية ان ينضرب المحتل الأمريكي بجلاق عراقي ما يكوم من بعدها .. على كل حال المالكي أبدى أسفه للرئيس الأمريكي بوش على زوج القنادر وقال : امسحها بوجهي !!!

والله غريب عجيب هذا المالكي هو وجهه وجه النعال ويجي بوش يمسحه بزوج قنادر .. خاف المالكي صاير وكيل باتا واحنا ما ندري ؟؟؟!!!

على كل حال البطل منتظر الزيدي حرك جوانا أشياء كلش جبيرة يمكن من خلالها تغيير مسرى التاريخ ، وانطانا دفعة شجاعة بمواجهة العدو الأمريكي بكل ما نملك وان الاحتلال الأمريكي بكل ما يملك من قوات وأسلحة مدمرة يمكن الانتصار عليه بزوج قنادر.. وعاشت إيدك ياعراقي يا أصيل !!!

نشمي