آخر شحنـــــة نفـــــــط ( الفصل الرابع )
بدأ وصول الزعماء الخليجيون للرياض وبدأ رئيس النقمة عفوا القمة ملك السعودية يستقبل الوفود ,أول وفد وصل كان الشيخ صباح راكب البغل صاحب الرقم الأميري والمطلي باللون الأزرق تيمنا بلون فانيلة المنتخب الكويتي ومركب عليه ستيريو واف ام علمود ونسة الطريق والحقيقة انه كان فاتح على برنامج سوبر ستار ,والشيخ صباح أدلى بصوته للفنان الكويتي ( المبرقع ) لتشجيع مثل هيجي كفاءات وطنية .
وصل الشيخ صباح وبدأت فرقة العزف بعزف النشيد الوطني الكويتي وهو نشيد صمم خصيصا في نادي بلاي بوي يدعو الى السلام والوئام مع جميع دول العالم عدا العراق لأنه ذو ماضي أسود بدخوله الكويت سنة 1990 يعني بعد مرور 60 سنة ما نسى الكويتيين جرح دخول العراقيين للكويت لأننا مثل ما تعرفون انه احنا في عام 2050 ولحد هاي اللحظة يتأمل الكويتيين برجوع الأسرى الكويتيون اللي يحتجزهم العراق.
فالشيخ صباح معلق يافطة على بغلته كاتب عليها ( لن ننسى أسرانا ) لوفائه لهذه القضية , فهم لا ينسون أسراهم حتى بعد مرور ألف عام ,وهنا يعلق أحد العراقيين شنو جا قابل هذولة كلهم راح يصيرون مثل المهدي المنتظر !!!
المهم نزل الشيخ صباح من بغلته وهو ملثم لأن عاصفة الصحراء كانت قاسية عليه .استقبله ملك السعودية بالترحيب وأول شي كال له ( أتمنى أن تكون جايب معاك مصاريف الاقامة )ضحك الشيخ صباح وسوى نفسه مطنش !
وصل شيخ دولة قطر على عربانة من مالوت باب الشرجي ببغداد اللي كانوا زمان الحماميل ينقلون فيها البضايع وتطورت وصارت ينقلون بيها الجرحى , دارت ولفت هالعربانة علمود تنقل أمير قطر شخصيا وتذكره بجرائمهم اللي سووها بالعراق .
وأول ما وصل أمير قطر بدأ ملك السعودية يستقبله بالتراحيب وأول شي كال له ( أتمنى أن تكون جايب أكلك معاك )بعدين وصل رئيس دولة الامارات بموتور سيكل فيزبا , وكان لابس وزار وقميص وداهن شعره بكيلو دهن تاتا , استغرب ملك السعودية وكال : شنو رئيس دولة الامارات داز الصبي اللي عندهم ؟ رد عليه أحد المساعدين : لا يا طويل العمر هذا هو رئيس دولة الامارات لأن الهنود سووا انقلاب في الامارات واستلموا الحكم وهذا شيخهم بابو بن شنكر خان آل نهيان .
انعزف النشيد الوطني لدولة الامارات الهندية المتحدة وهو عبارة عن أغنية هندية مالت فيلم الشعلة !
وبعد نص ساعة وصل ملك البحرين بعربانة يجرها حصان أجرب من مالوت أبو الغاز , سلم على ملك السعودية وهناك عزفوا السلام الملكي البحريني وهو عبارة عن أغنية بلاك أور وايت للمطرب المرحوم مايكل جاكسون .
ما تحمل ملك البحرين أن يمسك مشاعره الجياشة اتجاه الأغنية وكام نزع دشداشته وبدأ يرقص بريك دانس , والحقيقة أنه أبدع في الرقص فساعة يرقص رقصة الحية , وساعة يرقص يسوي خمسات , وساعة يرقص رقصة المشي لورى الى أن انتهى السلام الملكي لمملكة البحرين .
الكل صفق لملك البحرين على هالاستعراض الحلو والكل أحضر أوتوغرافات علمود يحصلون على توقيعه ,واذا تريدون الصدك ان الكل كانوا يعتقدون انه خليفة مايكل جاكسون المنتظر للشبه الكبير اللي يجمع ما بين الاثنين !!!!!!آه بس لو أعرف ليش ملك البحرين يشبه مايكل جاكسون ؟؟؟؟؟!!!!!!!!
أخيرا وصل سلطان عمان أبو لحية شقرا وعيون زرق .... غريبة ... لحية شقرا ... وعيون زرق !!!لايا جماعة ما غريب الا الشيطان يعني ما يصير سلطان لحيته شقرا وعيونه زرق ... يا جماعة السلطان أمه انكليزية وما بيها شي ... شنو ملك الأردن بشنو أحسن من عنده؟ أشو هم أمه انكليزية وأبوه يهودي .. بقت على سلطان عمان ؟بس الشي الغريب اللي صدك استغربوا منه الزعماء هو أن السلطان مو لابس خنجره .. الكل يتساءل وين خنجر السلطان ؟ملك السعودية يسأل السلطان : عسى ما شر يا خوي ان شاالله ما سركوك بالطريج وأخذوا خنجرك ؟
السلطان : لا يا طويل العمر أنا قبل شهرين حضرت مؤتمر نزع السلاح بتل أبيب ,وحلفت لهم بالطلاق أنه أنا أكون من أولى الدول التي تنزع سلاحها حفاظا على أمن المنطقة والسلام فيها , والحمدلله نزعت سلاحي وووو .....بس .
الشيخ صباح يتدخل ويستخف دمه : أنا يا ريت كنت حالف لهم بالطلاق على الأقل كنت طلقت حرمتي القديمة هع هع هع هع
ملك السعودية لصباح : على ساس انتو اشلون ترسانة أسلحة عندكم خخخخخخخخ خلينا ندخل الخيمة علشان نعقد القمة أحسن من كلامك البايخ خخخخخخخخخ
نشمي
0 التعليقات:
إرسال تعليق