رقوبي يحكم العراق (الحلقة العاشرة والأخيرة)

رقوبي يحكم العراق

الحلقة العاشرة والأخيرة

رجع رقوبي لبغداد وفشل اعدام عبد العظيم كان كلش مأثر عليه وعلى حكومته لأنه بمثابة هزيمة لهيبة رقوبي كرئيس للجمهورية بس اللي تأثر أكثر من رقوبي هو رئيس المخابرات أبو زياد لأنه بالاضافة انه هو أحد أفراد الحكومة الا انه بينه وبين عبد العظيم ثأر شخصي فشل على تصفيته ..

رقوبي يحكم العراق (الحلقة التاسعة)

رقوبي يحكم العراق

الحلقة التاسعة

يقولون انه رقوبي كد ماهو مسيطر على العراق حب انه يلغي الدينار العراقي ويخلي عملة ثانية مكانها وطبعا لأنه صار مغرور بنفسه قرر انه العملة الجديدة للعراق يسميها (رقوبي) على اسمه علمود التاريخ يذكر انجازه العظيم .. بس المشكلة انه اذا حب واحد يشتري مطي مثلا لو جحش من سوق الحمير المركزي راح يقول اشتريت جحش بثلاث ميت رقوبي !!!
هسة احنا مو بحال الحمير ولا بحال بكم رقوبي راح تشتريها .. احنا هسة بحال عبد العظيم اللي وكع بايد رئيس المخابرات اللي ما يرحم أبو زياد .. يقولون انه أبو زياد بدع في تعذيب عبد العظيم حتى انه من غيظه من عبد العظيم صار يعضه من خشمه بكل قوة وهناك اجة قرار اعدام عبد العظيم موقع من رئيس الجمهورية رقوبي !!!
أبو زياد رقص جوبي من الفرحة لقرار اعدام عبد العظيم وحب أبو زياد انه يعدم عبد العظيم بايده ولبس ملابس العشماوي مع قناع علمود محد يعرفه طبعا بحضور بعض الشخصيات اللي تمثل رقوبي رئيس الجمهورية على رأسها وسام الحماية الشخصية لرقوبي وقبل عملية الاعدام قال وسام : يعيش الريس رقوبي .. يعيش يعيش !!!
عبد العظيم والحبل على رقبته : رقوبي ؟ هي هاي المرجلة ؟ طيح الله حظكم وحظه !!!
أبو زياد كان بعجلة انه يعدم عبد العظيم وقرر انه بعد الاعدام يشرب من دمه علمود يبرد قلبه !!!
طبعا بهاي اللحظات كان رقوبي يراقب عملية الاعدام عن طريق التلفزيون وهناك رن التلفون ورفع رقوبي السماعة ..
رقوبي : ألو ؟ منو ؟ شكو ؟
شهاب أخو عبد العظيم : شوف رقوبي ترى آني هسة خاطف أولادك حمودي وصهيب ، اذا تحب انهم يعيشون الغي قرار اعدام عبد العظيم واطلق سراحه والا ترى أسوي أولادك واحد أفرمه وأسويه كباب واللاخ أقطعه و أسويه تكة !!!
رقوبي : كباب وتكة عالفحم ؟
شهاب : ولك أثول .. هذا وقت شقا ؟ اذا ما تطلق سراح عبد العظيم راح أطك أولادك بالدهن .. افتهمت ؟؟؟
رقوبي اتصل شخصيا بأبو زياد .. وأبو زياد رن عنده الموبايل أثناء عملية الاعدام وقبل ما يفتح الحبل على عبد العظيم قال : هذا يا مطي متصل بية هسة؟؟؟
هو هذا وقت اتصالات ؟؟؟!!!
أبو زياد : ألو .. شتريد ؟ مو هاي أجمل لحظة بحياتي !!!
رقوبي : الله يخليك أبو زياد الغي الاعدام ترى فيه مستجدات ولازم نلغي الاعدام!!!
أبو زياد : لو تنقلب الدنيا فوكاني جواني ما راح ألغي الاعدام .. هاي فرصة العمر لا يمكن أتخلى عنها !!!
رقوبي : ترى السيستاني أفتى فتوة بعدم جواز اعدام عبد العظيم !!!
أبو زياد : خلي يطير أخو القـ... هذا مو شاطر الا بالفتاوي وجمالة كلها خريط بخريط !!!
رقوبي : الله يخليك أبو زياد ترى شهاب خطف أولادي حمودي وصهيب ويمكن يخطف ابنك النونو وتنلاص علينا .. ترى اذا شهاب قتل أولادي أم حمودي راح تطلقني وتنيمني بالشارع .. استر علية الله يستر عليك !!!
أبو زياد بعدما انتهت المكالمة : طيح الله حظك رقوبي مو شاطر الا على الشعب العراقي مسوي نفسه رجال كدامهم ونافش ريشه وجاي يعدم بيهم بس في البيت يخاف من مرته ويرجف منها .. هذا غير رئيس جمهورية مرعبل !!!
أبو زياد ألغى الاعدام وقال بالحرف الواحد مقولته الشهيرة : انني ألغي اعدام عبد العظيم وكأنني أتجرع كأسا من السم !!!
التلفون رن على رقوبي : ألو ؟ منو ؟ شكو ؟
شهاب : ها الغيت الاعدام ؟؟؟
رقوبي : الغيناه .. بس وين حمودي وصهيب أريد أسمع صوتهم !!!
حمودي : بابا .. هذا شهاب ضحك علينا وانطانا نستلة وقال انه راد يودينا على أهلنا !!!
رقوبي : زمايل .. وصدقتوه ؟ كدر يلعب بعقلكم ؟؟؟
حمودي : بابا .. النستلة جانت طيبة !!!
رقوبي : ولكم جوعية مو جاي أجيبلكم نساتل أشكال وألوان من سويسرا!!!
صهيب : بابا .. هذا شهاب ضحك علينا وقال انه هاي النستلة تركية ما بيها شحم خنزير وآني فكرت أنطيه هاي النستلة السويسرية الكلها شحم خنزير وينطيني التركية .. مو زين فكرت أضحك عليه ؟ مو أنت علمتنا انه نضحك عالناس ونسمط أبو أبوهم ؟!!!
رقوبي : ولكم زمايل أولاد زمال .. هيجي اللي يريد يضحك عالناس الا تنطوه النستلة السويسرية .. خو انطوه النستلة الأردنية الجايفة واخذوا التركية !!!
شهاب : هسة انتو تركتوا كل شي واجيتوا عالنساتل .. صدك تافهين .. شوف ترى هسة آني عالحدود العراقية السورية بمنطقة بين الحدين وأحجي وياك من خيمة المزورجية .. تسلم عبد العظيم لأبوداوود الكبيسي أبو السوبر ماركت تستلم جهالك من خيمة أرقام السيارات المزورة .. افتهمت ؟!!!
رقوبي : بس الله يخليك رجع النساتل السويسرية وية حمودي وصهيب ترى غاليات ومشتريهم بالدولار ومستقطع فلوسهم من دائرة الأيتام العراقية !!!
شهاب : شنو ؟ أرجع النساتل ؟ أصلا النساتل هاي أعتبرها غنائم حرب وتعويض عن تعذيب عبد العظيم وحبسه .. راح أقسمها بين جهالي وجهال عبد العظيم .. افتهمت ؟؟؟!!!
هسة احنا بمنطقة بين الحدين عند الحدود السورية العراقية وعملية تبديل الأسرى راح تتم بعد لحظات .. في الطرف العراقي كان رقوبي مع أبو زياد ووسام وكان معاهم عبد العظيم وهو مربوط بحبل .. أما في الطرف اللاخ فكان شهاب وهو محتجز حمودي وصهيب !!!
رقوبي أطلق سراح عبد العظيم بعد ما فك الحبل عنه وبالمقابل شهاب ضرب جهال رقوبي جلاليق وخلى سبيلهم وتمت عملية التبديل بنجاح تام !!!
الشيء الغريب انه رقوبي أصدر بيان عن نجاح عملية (سن الذيب) وانه تم القاء القبض على عبد العظيم الويسي المساعد الثاني لأبو عمر البغدادي قائد تنظيم القاعدة في بلاد الرافدين .. واللبيب من الاشارة يفهم !!!

نشمي

رقوبي يحكم العراق (الحلقة الثامنة)

رقوبي يحكم العراق

الحلقة الثامنة

استلم رقوبي الحكم في العراق وعين كرئيس للجمهورية وأول شي سواه رقوبي لدعم الديمقراطية واعتبرها هدية للشعب العراقي هو جملة اعدامات في حق مجموعة من العراقيين كانت (مضوجة) فخامته وأول واحد تم اعدامه هو محسوبكم العبد الفقير لله نشمي لأنه كان دائما يشهر برقوبي ويكتب عليه مقالات ويؤلف عليه قصص وطبعا كل واحد مضوج رقوبي يأمر رقوبي باعدامه الى أن وصلت الحالة بأن صار الاعدام عند رقوبي مثل الزلاطة وأمر الاعدام صار يتخذه بكل سهولة والعالم صارت كلها تصف نظام رقوبي بالدموي وكل هذا يتم طبقا للسياسة الكلش ديمقراطية .. ويكولون ان رقوبي صارت حياته كلها ديمقراطية .. يتريك ديمقراطية ويتغدى ديمقراطية ويتعشى خفايف سندويشات ديمقراطية مع قوطية ديمقراطية لزوم الهضم .. بس يا ويل ويله اللي يعارض ديمقراطية رقوبي مو لشي بس فخامته ما يحب انه أحد يعكر عليه النظام الديمقراطي اللي بناه بكفاح ونضال سنين طويلة قضاها فخامته بنوم طويل الأمد !!!
يكولون ان رقوبي راد يربي أولاده حمودي وصهيب تربية صالحة بعيدة عن العنف .. تعالوا وياية نعيش هذا المشهد اللي يعكس حكمة عظيمة راد رقوبي ينقلها لأولاده :
رقوبي يحجي وية أولاده حمودي وصهيب : ولدي .. آني جمعتكم اليوم علمود أعلمكم حكمة راح تفيدكم طول عمركم ومن خلالها راح تقدمون أكبر خدمة انسانية للشعب العراقي !!!
حمودي : ليش بابا أنت راح تموت ؟؟؟
صهيب : لا ولك شنو أنت تفاول على أبونا .. بابا يمكن هو مريض وجاي يخرف وما دا يدري شنو يكول !!!
رقوبي : ألا يا أدب سزية .. واحد يريد يموتني وواحد يريد يسويني مريض ومخرف .. آني ربيتكم هيج ؟؟؟
حمودي : ايه بابا أنت ربيتنا هيج .. مو أنت اللي دايما تجذب على الناس وتكوللهكم انه آني راح أوفرلكم الأمن والأمان وانه راح أقضي على الفساد وراح أخلي العراق تصير بيه كهرباء وان الماي راح يتوفر بغزارة بكل بيت عراقي وجمالة ماي نظيف مو وصخ وانه راح أخلي الدينار العراقي يصعد سعره لـ ...
رقوبي : بس بابا .. هذا الكلام منو علمك اياه ترى كله مغالطات لأنه ماكو واحد مثلي عطوف على العراقيين .. بس لو أعرف منو هذا اللي علمك هيجي حجي بالله الكريم لأعلكه وأعدمه كدام الناس كلها هو وأهله وأخليه عبرة لكل العراقيين !!!
صهيب : بابا .. أنت اشلون تكول أنك عطوف على العراقيين وجاي تعدم بيهم؟؟؟!!!
رقوبي : وليدي سؤالك هذا كلش عجبني .. شوف راح أضرب لك مثل حي على سؤالك أنت وأخوك هالجربان .. هسة هاي ثلاث كواني وكل كونية فيها مجموعة فيران في قمة نشاطها .. تعال أنت يا حمودي وحاول تطلع من الكونية الأولى بايدك فار فار بدون ما يهرب منك ولا فار !!!
حاول حمودي يطلع الفيران واحد واحد وكدر يطلع فارين من أصل عشرة والثمانية الباقيات هربن من الكونية لأن الفيران سريعة وصعب السيطرة عليها !!!
رقوبي : هسة أنت دورك يا صهيب تعال وطلع الفيران واحد واحد من الكونية من غير ما يهرب منك ولا فار !!!
صهيب حاول أنه يكون أسبع من حمودي وكدر يطلع ثلاث فيران من أصل عشرة والسبعة الباقيات هربن منه !!!
رقوبي : شوفوا انتو ما كدرتوا تسيطرون على الفيران وكلهن هربن من عدكم بس آني هسة راح أعلمكم اشلون تسيطرون عليها وراح أطلع من الكونية الثالثة واحد واحد من غير ما يهرب مني ولا فار !!!
أخذ رقوبي الكونية الثالثة وصار يفرها بالهوا عدة فرات علمود يدوخ الفيران وفعلا الفيران داخت وصارت مو كادرة تهرب وكدر رقوبي انه يسيطر عليها ويطلعها من الكونية فار ورا فار من غير ما يهرب منه ولا فار لأنها مثل ما كلنالكم دايخات وما تكدر تهرب !!!
رقوبي : ولادي شفتوا اشلون آني سيطرت على الفيران وطلعتهن واحد واحد من غير ما يهرب ولا فار .. وهذا نفس الشي وية الشعب العراقي اذا ما تدوخه وتشغله بأمور حياته لا يمكن تسيطر عليه , وأفضل طريقة هي أنك تدوخه بأمور حياته بأبسط مستلزماته .. امنع عنه الكهرباء وامنع عنه الماي النظيف وامنع عنه الأمن والأمان وامنع عنه بنزين السيارات وامنع عنه الحصة التموينية والنتيجة انه يدوخ ويسير من السهل السيطرة عليه لأنك دا تكفخه على راسه بطريقة غير مباشرة !!!
حمودي : بابا .. أنت شنو تستفيد من هذا كله خو انطي للشعب اللي يريده وخلص نفسك !!!
رقوبي : آني هواية زعلان عليك وليدي لأنك دا تفكر بطريقة مال واحد أثول .. هذولة العراقيين اذا تنطيهم عين راح ياكلوك وما راح تكيش معاهم .. أنت تعرف شنو راح يصير اذا وفرتلهم كل هاي الأمور ؟ راح يطالبوك بأشياء أكبر من هاي وراح يتدخلون بطريقة حكمك للشعب وراح يحاسبوك عالفلس وراح يجبروك أنك تنقاد إلهم وما راح يخلوك تتنفس ولاراح يخلوك تحول لحسابك بسويسرا ولا فلس .. وبالأخير يطكوك بالدهن ويتخلصون من عندك وتصير مو خوش وراح ينشروك عالحبل ويطلعون كل فضايحك .. ولك هذولة العراقيين ما ينعطون وجه وخليك هيج أحسن كل ما واحد بيهم يرفع راسه اكفخه عليه !!!
صهيب : والله يا بوية راح العن لك والديهم وراح أصمط أبو أبوهم !!!
حمودي : ولا يهمك بوية .. راح أخليهم يمشون ويتلفتون حواليهم من الخوف واللي يكول ليش راح أوريه شي ما شافه طول عمره !!!
رقوبي : عفية ولدي .. هيج أريدكم .. ديمقراطيين للنخاع .. الحمدلله اللي خلاني أربي ولادي تربية صالحة بعيدة عن الانحراف .. وبهاي المناسبة راح أصلي ركعتين شكر لله وأدعو ربي انه يحفظ لي هالولاد ويصيرهم لخدمة الوطن !!!
(التلفون يرن)
رقوبي : ألو ؟ منو ؟ شكو ؟
وسام بعد ما استلم الحماية الشخصية لرقوبي : سيدي .. السيارة جاهزة لنقلك لقصر النوم !!!
رقوبي : ايه والله صارلي ساعة كاملة ما نمت أروح أنام لأنه بعد النوم عندي جلسة نوم استعدادا ليوم النوم العالمي !!!
انطلق موكب الريس رقوبي من القصر الرئيسي لقصر النوم وفي نص الطريق انحصر رقوبي وشعر انه بحاجة يروح للتواليت وهناك قال للسايق رحمة لأبوك أوكف هنا ترى راح أسويها على نفسي .. اليوم ماكل مركة بانية ويظهر اجة وقت الـ... !!!
السايق : سيدي .. بس هنا ماكو تواليتات علمود تسويها !!!
رقوبي : يا معود ترى راح أسويها على نفسي وأخزيكم .. ايه أوكف هنا راح أروح ورا التلة هاي وهناك أسويها !!!
السايق أشر لبقية سيارات الموكب انه هنا نريد نوكف .. وهناك السيارات كلها وكفت .. وراح رقوبي ورا التلة بس شوية بعيد وسواها على شكل علامة استفهام وأثناء ما كان يسويها كان يغني (جنة يا وطننا) .. وبعد ما انتهى رقوبي من الـمهمة الجبارة رجع على الموكب وكانت المفاجأة انه الموكب اتعرض لعملية اغتيال جماعي وطبعا الهدف كان معروف وهو محاولة اغتيال رقوبي .. رقوبي حس انه ذهابه للتواليت كانت بمثابة انقاذ إله من محاولة الاغتيال فرجع رقوبي مكان ما سواها وقال لعلامة الاستفهام : منين أبوسج منين ؟؟؟!!!
أجهزة المخابرات كانت كلش صاحية .. وأبو زياد بعد ما استلم المخابرات حب انه يطور جهاز المخابرات علمود يثبت لرقوبي انه صاحي ومو نايم فأعلن انه عبد العظيم عدوه اللدود هو ورا عملية الاغتيال فألقى القبض على عبد العظيم وهنا تنتهي حلقتنا ونشوفكم في الحلقة القادمة علمود نشوف شنو راح يصير بعبد العظيم ؟؟؟!!!

نشمي

رقوبي يحكم العراق (الحلقة السابعة)

رقوبي يحكم العراق

الحلقة السابعة

بدأ رقوبي يتداخل في المجتمع العراقي وبدأت تصير له شعبية كلش جبيرة بين الناس وبدأ ينسق علاقاته مع الصغار قبل الكبار تحت عنوان (رقوبي تك باب .. نصير كل الأحباب) .. وصار رقوبي يطلع بالتلفزيون .. مرة بعمل مؤتمر لرجال الأعمال المغتربين .. ومرة بالدعايات الاعلانية .. ومرة بأخبار العراق .. والتلفزيون العراقي صار ما إله شغلة غير رقوبي :
مثلا مرة يطلع بـ :
ــ رقوبي يتبرع لأيتام العراق
ــ رقوبي يتبرع بعمل مستشفى
ــ رقوبي يفتتح مركزا لمعالجة انفلونزا البعير
ــ رقوبي في دعاية شامبو ركي
ــ رقوبي في دعاية حفاظات أطفال
ـ حتى اذا تفتح الحنفية راح يطلعلك رقوبي بدل الماي !!!
والمصيبة انه خلى الناس تناديه بدكتور رقوبي .. متى صار رقوبي دكتور؟ ما نعرف بس اللي نعرفه انه كان بالسويد ويمكن حصل عليها من احدى جامعاتها .. أو انه رقوبي زار سوق مريدي وولاد الحلال باعوا له شهادة الدكتوراه ، على كل حال التاريخ راح يظهر الحقيقة .. ويالا .. خلي الرجال يترزق الله لأن الوزراء العراقيين اللي بالحكومة الحالية كلهم بليلة وضحاها صاروا دكاترة .. والبركة بسوق مريدي !!!
حتى المشاريع والصفقات اللي رقوبي قام بيها أكثرها مشاريع وهمية مالها أساس من الصحة بس الناس تصدق كلامه لأنها صايرة مثل الغرقان اللي يريد يتعلق بقشاية ، والمستفيدين من هاي الحركات هواية خاصة انه موعد الانتخابات الرئاسية صار قريب ورقوبي صار يهيء نفسه الها والكل أصبح ما عنده سيرة غير رقوبي واشلون راح يقضي على الفساد ويحول العراق الى قطعة من الجنة حتى انه فكر بمشروع تشغيل الخليجيين كعمال وخدم عند العراقيين .. صحيح هو حلم بعيد عن أرض الواقع بس عند رقوبي كل شي ممكن وكأن الشعب العراقي يعتقد انه رقوبي عنده عصا سحرية تغير من حالتهم التعبانة الى حالة ممكن يحسدها عليها جيرانه وكل العالم !!!
الانتخابات هسة بقمتها ومثل ما المالكي تعهد للشعب العراقي انه يفرض دولة القانون كوعد للعراقيين .. أخذ رقوبي على عاتقه انه يخلي الحصة التموينية للعراقيين فيها نوع من الرفاهية وقال في خطاب أذاعه في التلفزيون : انه من حق العراقيين ان يتذوقوا طعم الرفاهية .. ودبة طرشي لكل مواطن عراقي حلم من السهل على رقوبي تحقيقه .. ولما الصحافة سألت رقوبي : اشدعوة دبة طرشي لكل مواطن ؟ مو هواية عليه ؟؟؟ يجيب رقوبي بكل ثقة : خلي العراقيين يترفهون .. ويابا مو بس دبة طرشي .. نخليها دبة طرشي ونضيفلها تكة جكاير سومر وخلي المواطن العراقي يحرقها بالصحة والعافية !!!
وهناك صفق العراقيين كلهم على هاي المبادرة الكريمة .. طرشي وجكاير ؟؟؟ شنو يريدون العراقيين أكثر من هيجي رفاهية ؟؟؟
صور رقوبي صارت بكل مكان على اليافطات وعلى السيارات وعلى المحلات وعلى الأسوار وعلى التواليتات وبكل مكان تتصوره تلاكي صور رقوبي عليها ووصلت الحالة انه حتى اللي يريد يروح للتواليت وما يلاكي ماي أو أوراق كلينكس يستعمل صورة رقوبي كحل أمثل !!!
الامام آية الله العظمى السيد علي السيستاني أصدر فتوة بأن اللي ما ينتخب رقوبي ما راح يدخل الجنة وزوجته راح تكون طالق الى يوم القيامة ، وان أمير المؤمنين ما راح يشفع له يوم القيامة وما راح يدخله الجنة !!!
العراقيين هالمرة تسارعوا لصناديق الاقتراع والكل شاركوا بالانتخابات ورقوبي كلش فرحان من فتوة السيد السيستاني لأنه حس ببركتها وانها صدك راح تخلي الناس ينتخبون بس رقوبي .. صحيح هي كلفته الملايين من الدولارات بس والله مو خسارة لأن رقوبي بهاي الملايين اللي دفعها راح يشفط من وراها مليارات وتتحول على رصيده السري بسويسرا !!!
احنا هسة بليلة نتائج الانتخابات .. ورقوبي على أحر من الجمر يريد يعرف النتيجة وبكم نسبة راح يفوز وصار كل شوية يتصل على رئيس المخابرات الأمريكية :
رقوبي : مساء الخير يا أبو السي آي ايه ؟ اشلونك ؟
رئيس المخابرات : ولك والله ثبرتني كل شوية متصل بية شنو ما تريد تروح تنام ؟ أشو مو عادتك صاحي لهسة ؟
رقوبي : ما تكوللي اشلون راح أنام ونتيجة الانتخابات بعد ما طلعت ؟ مو من حقي اني أعرف شنو مصيري ؟ ومو من حقي أعرف مصير هالبلد ؟
رئيس المخابرات : يعني تريد تفهمني انه قلبك عالبلد مو على مصالحك الشخصية؟
رقوبي : وشرفك .. انه قلبي عالبلد !!!
رئيس المخابرات : حلوة هاي انك تحلف بشرفي .. أصلا احنا اللي نشتغل بالسي آي ايه ما عدنا شرف .. وشرط توظيفنا بهاي الدائرة انه الواحد ما يكون عنده ذرة شرف .. واللي نحس انه الواحد عنده ذرة شرف نطلعه من هاي الدائرة أو نطكه بالدهن مثل ما جماعتكم يسوون بالواحد لما يريدون يخلصون من عنده !!!
رقوبي : عااااااااا ؟ يعني همينة انتو عدكم شغلات التصفية الجسدية ؟ لعد وتكولون عدكم ديمقراطية وانه الواحد يتكلم مثل ما يريد وعدكم حرية الرأي والتعبير وانه الواحد مو مقيد بأفكار معينة وهالله وهالله .. واللي يعاشركم يكول انكم رب الدكتاتورية وما عدكم لا حرية ولا ديمقراطية ولا حتى ضمير !!!
رئيس المخابرات : والله ضحكتني بشغلة الضمير هاي احنا لو عدنا ضمير جان ما ذبحنا وقتلنا الناس بكل أنحاء العالم وجان هسة ما غزينا العالم وجان هسة ما شفطنا دول العالم كلها .. أصلا احنا عايشين عالسرقات ونهب ثروات الشعوب حبيبي احنا عدنا خطوط حمراء ما نسمح لأي أحد انه يتجاوزها .. واذا لا سمح الله تجاوزها راح نوريه العين الحمرة !!!
رقوبي : أشو كل شي عدكم أحمر خطوط حمرة وعيون حمرة ودم أحمر .. بس احنا عدنا الركي بس أحمر .. صدق لعينها عيونكم من برة فاتحة وعسلية ومن جوة غامجة و حمرة .. هسة عوفك من شغلة العيون وكوللي ها سبع لو غراب ؟
رئيس المخابرات : سبع لو غراب ؟ شنو بحديقة حيوانات احنا ؟
رقوبي : مو هو اللي يعاشركم لازم يصير حيوان ها ها ها ها !!!

رئيس المخابرات بصوت واطي : ألا يا سخيف !!!
رقوبي : هسة ها كوللي شنو نتائج الانتخابات ؟
رئيس المخابرات : عندي الك خبر نصه محزن ونصه الثاني مفرح .. النص الأولاني يقول : ان نتيجة الانتخابات في البداية اجت مو مثل ما تريد وكانت نسبة نجاحك 0,00000001% يعني الناس ما انتخبتك والصوت الوحيد هو كان صوتك!!!
رقوبي : شنو ؟ بس صوتي؟ لعد آني دافع للسيستاني ملايين من الدولارات علمود تكولولي انه بس صوتي هو اللي انتخبني .. ألا يا مضروب الجلوة يا سيستاني طلعت حرامي وكذاب همينة ؟؟؟!!!
رئيس المخابرات : مو السيد السيستاني بعد ما قبض من عندك اجاه المالكي وعرض عليه عشرين مليون دولار وخمس ملايين تبرع لأيتام السيستاني !!!
رقوبي : تقصد بالأيتام ولاد الحرام اللي دا يربيهم السيستاني ؟؟؟

رئيس المخابرات : رجاءا مصطلح ولاد الحرام ما نريدك تستخدمه لأنه عدنا بأمريكا كلها ولاد حرام وما نريدك تجرح مشاعر الشعب الأمريكي !!!
رقوبي : لعد بس انتو تجرحون مشاعرنا وتدوسون على كرامتنا ؟؟؟!!!
رئيس المخابرات : أرجوك خليني اكمل لك السالفة واترك شغلة الحرام والضمير لانها ما توكل خبز .. السيستاني لما قبض من المالكي وضربك بوري أصدر فتوة خلى الناس تتراجع عن انتخابك وصاروا ينتخبون المالكي فضغطنا احنا عليه ودفعناله كم مليون علمود يرجع يعدل الفتوة مالته بس اختصارا للوقت زورنا الانتخابات وخليناها تصير لصالحك وهسة انت فزت بنتيجة 99,9999999% ومبروك عليك رئاسة جمهورية العراق !!!
رقوبي : صدك آني فزت بالانتخابات .. منين أبوسك منين ؟
رئيس المخابرات : طبعا لا تنسى تروح للسيستاني وتنطيه كم مليون لانه الرجال مفلس ويريد فلوس !!!
رقوبي : آني مو غاثني الا هذا السيستاني .. صاير مثل المنشار طالع ياكل نازل ياكل .. لو يوافق السي آي ايه أصير سيد وأفظها مو جان أحسن لأنه اذا رئاسة جمهورية تتوقف على فتوة من واحد مثل السيستاني .. لعد اشلون ناس مرعبلين اللي كلمة من السيد تقلب موازينهم ؟؟؟!!!
رئيس المخابرات : لعد يا رقوبي احنا اشلون نتحكم بالوضعية اذا ماكو واحد مثل السيستاني دا يوفر علينا جهد وتفكير .. الناس عدكم هنا أرضية خصبة لأمثال السيستاني .. واحنا نكون أكبر أغبياء اذا ما استغلينا السيستاني علمود نعبر ملاعيبنا ومؤامراتنا لأنه دا يسهل علينا هواية من الأمور .. وأنت لازم تؤمن بقدرة السيستاني على تغيير الموازين !!!
رقوبي : زين مو خايفين انه السيستاني يقلب عليكم وممكن انه يعلن الجهاد ضدكم ؟
رئيس المخابرات : والله ضحكتني .. لا تنسى انه السيستاني عجمي فارسي واحنا والايرانيين أصدقاء ولا يغرك الاعلام وشنو يكولون في الأخبار .. ترى احنا وية الايرانيين واليهود عدنا عداء مشترك للعرب وهنا تلتقي المصلحة ولما تلتقي المصلحة تصيرالمؤامرات الدنيئة ضد العرب متعة كأن الواحد دا يمثل فيلم في هوليوود .. افتهمت هسة ؟؟؟!!!
رقوبي : هاااااااا ؟ يعني مو كلش !!!
رئيس المخابرات : أحسن ظل هيج مو فاهم لأنه اذا افتهمت راح يوجعك راسك ويصير ما اله دوا غير فسوة .. عفوا فتوة من السيستاني !!!

نشمي

رقوبي يحكم العراق (الحلقة السادسة)

رقوبي يحكم العراق

الحلقة السادسة

(المشهد .. رقوبي في الطيارة المتجهة للعراق ويرافقه واحد من المخابرات الأمريكية من أصل لبناني اسمه انطوني على أساس انه سكرتير رقوبي )
رقوبي : أكوللك .. آني نسيت أرتب الوضعية لعمي أبو زياد ووسام .. أنت تعرف انه أبو زياد راح يستلم المخابرات في العراق ووسام راح يكون الحماية مالتي يا .. نسيت شنو اسمك .. شنو اسمك أنت !!!
انطوني : انطوني !!!
رقوبي : شنو انطوك *؟؟؟ همينة أنت انطوك ملايين الدولارات وخلوها بحسابك؟ ترى هاي فلوس العراق وإلي بيها حصة* .. تدفعهن هسة لو أصمط أبو أبوك !!!
انطوني : يا زلمة شو عم بتقول؟ هيدا اسمي هيك .. انطوني .. اسمي انطوني غريب !!!
رقوبي : ليش غريب ؟.. ترى اسم انطوني مشهور ومو غريب !!!
انطوني : لا تجنني .. غريب هيدا اسم أبي .. مو إشي غريب !!!
رقوبي : يعني غريب مو غريب ؟؟؟!!!
انطوني : اللهم طولك يا روح .. يا ربي شو عملت أنا علشان تعاقبني هيك ؟؟؟!!!
حبيبي انسى اسمي هلق وخلينا بالمهم .. أنت سألت ليش عمك أبو زياد ووسام ما بدنا اياهم يجوا هلق؟ لأنه مش وقته همة راح يجوا للعراق لما تستلم حضرتك السلطة .. فهمت هلق؟؟؟ !!!
رقوبي : ايه علمود يكدر عمي يبيع التاكسي مالته و..
انطوني : هلق عمك هيدا بيسوق تاكسي ؟؟؟ وبدك اياه يستلم المخابرات بالعراق؟؟؟ لكان وسام شو بيشتغل حضرة جنابه ؟؟؟
رقوبي : وسام هذا فد واحد قمرجي و..
انطوني : إشي حلو والله سواق تاكسي وواحد قمرشي بدهم يكونوا بالسلطة .. والله عشنا وشفنا !!!
رقوبي : على كيفك أنت .. ترى المالكي كان يبيع سبح بالسيدة زينب بسوريا .. والجعفري كان يشتغل ملاية بالحسينية .. وموفق الربيعي نعال ما كان عنده .. وأحمد جلبي لولا ستر الله جان هسة هو بالسجن وكل الوزراء العراقيين اللي انتو جبتوهم ما عدهم شهايد وجمالة ايرانيين.. على الأقل عمي أبو زياد عنده شهادة من باكستان وهوعراقي ابن هذا البلد !!!
انطوني : ولك خلاص فضحتنا .. بدك تشرب شي ؟ هاي المضيفة هون .. بليز مدمازيل .. هاتيلي كاس مارتيني مع حبتين كرواسون وياريت الآيس يكون كتير .. وازا فيه ميلك شيك هاتيلي واحد !!!
رقوبي : كوللها أريد تمن ومركة بانيا مع طاسة لبن وفد راسين بصل !!!
انطوني : راس بصل؟ .. ييي شو هالقرف ؟؟؟!!!
رقوبي : ابن النعال لا تفيك* براسي .. روح اغسل جعبك بالأول وبعدين تعال احجي عن النظافة .. طيح الله حظك !!!
وصلت الطيارة لمطار بغداد الدولي .. ورقوبي كالعادة نايم وفاتح حلكه وبقايا مركة الباميا والبصل تشع ريحتها بكل الطيارة وموظف المخابرات الأمريكي اللبناني الأصل انطوني أغمي عليه من ريحة حلك رقوبي لأنه (الزلمة ما عم يتحمل ) !!!
وأول ما طلع رقوبي من باب الطيارة كان هناك حشد كبير من المستقبلين جايبين فرقة نحاسية تستقبل رقوبي .. وبيني وبينكم ترى هاي الحركة من تدبير المخابرات الأمريكية لزيادة شعبية رقوبي عند الناس علمود هيج الحرس الوطني العراقي وقوات بدر التابعة للمجلس الأعلى (مطنشين) ومسوين نفسهم انه الشغلة ما تخصهم لان الأوامر اجت بعدم التعرض من السي آي ايه الأمريكي .. ومنو يكدر* يعارض أوامر السي آي ايه ؟ مادام الأوامر أمريكية فعلى الحكومة العراقية السمع والطاعة !!!
انعزفت الموسيقى .. والناس صارت تغني وترقص لمنقذ العراق الجديد ورجل المستقبل الحديدي بأغنية مطلعها :
رقوبي يا تك باب
حبك بقلب كل الأحباب
ضحكتك تداوي كل الشباب
ورقتك تسعد كل الشياب
دمعتك منها الصخر ذاب
وروحك يا بعد رويحتي
منها الجرح طاب
واللي يعرفك زين يقول :
شعبنا بفضل حكمتك
راح ياكل تكة وكباب !!!

رقوبي انبهر من هالاستقبال الحلو وما صدك نفسه وبدون شعور صار رقوبي يرقص وية الناس ردح مال ولاد الثورة ويردد وية الشروكية : أها أها أها أها !!!
وبعد ما شبع رقوبي رقص اجت حماية مكلفة من المخابرات الأمريكية انها تنقل رقوبي بسيارات جيب مال حماية .. وبنص الطريق قال الموظف المسؤول على حماية رقوبي : سيدي .. احنا هسة راح نروح للسيد آية الله العظمى السيد علي السيستاني دام ظله وسادت بركاته وزادت تقواه و..
رقوبي : خلاص! ..أنت شوية وتكول شعر بيه .. هو اللي راح يحكم العراق لو آني؟
الموظف : المعذرة سيدي .. بس احنا عدنا موعد وياه ولازم نروحله حسب أوامر الأمريكان !!!
رقوبي يحجي وية نفسه : أشو هالمشعول الصفحة السيستاني مستعجل على الفلوس .. خوش خمط* دا يخمط .. والله لو كايليلي صير سيد أحسن ما أصير رئيس جمهورية .. على الاقل السيد فلوسه مضمونة ومحد يحجي وياه وجمالة مسيطر على الوضعية !!!

السيارات المكلفة بنقل وحماية رقوبي اتجهت لمكان غريب وهناك انفتحت الأرض ودخلت السيارات جوة نفق في الأرض .. وبعد ما دخلت السيارات انسد النفق ومشت السيارات الى أن وصلت لبيت شكله مخيف مثل مال أفلام الرعب وهناك قالوا الحماية لرقوبي : لهنا وكافي .. احنا ما نكدر نكمل وياك والأوامر تكول انه أنت تروح وحدك جوة !!!
رقوبي خايف : ولكم وين جايبيني ؟ المكان يخوف عبالك بيت دراكولا !!!
الحماية لملمت جويلاتها ورجعت بالسيارات وتركت رقوبي بوحده كدام البيت .. وطبعا رقوبي استسلم للأمر الواقع وحاول يدخل البيت المخيف وقبل ما رقوبي يدك الجرس انفتح الباب من وحده وطلعت مجموعة خفافيش من ورا الباب وطارت فوق .. رقوبي خاف أكثر بس هذا طبعا ما خلاه يتراجع ودخل للبيت وهناك شاف مجموهة مومياء محنطين على شكل سادة معممين وكل مومياء هي شبيهة لواحد من السادة الحقيقيين .. يعني فيه مومياء نسخة طبق الأصل للخميني ومومياء لخة شبيهة بالسيستاني ومومياء لخة شبيهة بمحمد باقر الحكيم وغيرها شبيهة بعبد العزيز الحكيم ولخة لخامنئي بس الشي الغريب انه مومياء مقتدى الصدر كان حجمها أصغر من الكل .. على ما اعتقد لأنه مقتدى الصدر همينة ربعه المعممين يعتبروه ( زعطوط ) علمود هيج خلوا حجمه همينة يكون زعطوط !!!
رقوبي صار يتمشى بالقصر وكل شوية تظهر له أشياء غريبة والحيطان معلك عليها صور معممين الصورة الأولى صورة السيستاني وهو جاي يلعب كرة سلة ولابس فانيلة نادي شيكاغو بولز .. والصورة الثانية لعبد العزيز الحكيم مع مقتدى الصدر كاعدين بكهوة وجاي يشربون شيشة ويلعبون طاولي والرئيس الأمريكي جورج بوش جار له اسكملي و جاي يشجعهم .. والصورة الثالثة للخميني وهو جاي يرقص بريك دانس بأحد المحافل الماسونية بتل أبيب وأعضاء الكنيست دا يصفقوله .. أما الصورة الرابعة فكانت لحسن نصر الله وهو جاي يسوي دعاية لعلب لحم خنزير مذبوح على الطريق الاسلامية وجاي ينطي لخامنئي لحسة منه .. والشي الغريب انه فيه صورة للسيد علي السيستاني وهو كاعد على التواليت وجاي يعصر بنفسه يظهر انها مو جاية تطلع بسهولة .. وطبعا كان هناك هواية من الصور اللي يعتز بيها السيستاني ومخليها ببيته !!!
هذا غير الكتابات باللغة الفارسية مع زناجيل بأحجام مختلفة وسيوف أشكال ألوان وسبح طويلة طولها من متر وأنت صاعد !!!
وبين ما رقوبي جاي يتفرج على الشغلات الغريبة فجاة طلع صوت ناعم يقول : السلام أليكم هبيبي رقوبي !!!
طبعا الصوت كان صوت السيد علي السيستاني وسع الله مخرجه .. وبما أن السيد السيستاني ما يعرف عربي كان مخلي مترجم من اللغة الفارسية للعربية .. على ما أعتقد ان المترجم هو أبو سنان !!!
رقوبي استغرب من الصوت لأن السيستاني في البداية كان مخفي وفجأة طلع بخار أبيض بشكل كثيف وبعد ما زال البخار ظهر السيد علي السيستاني وهو كاعد على عربانة مال معاقين تشتغل على الريموت كنترول !!!
السيستاني باللكنة الفارسية : السلام أليكم هبيبي رقوبي !!!
رقوبي راح كبل للسيستاني وباس ايده
رقوبي : وعليكم السلام مولاي قاهر الظلام !!!
السيستاني : هازه آني قاهر الزلام ؟ على كل حال مو مشكلة أنت جبت الفلوس وياك ؟
رقوبي : مولانا أشو مستعجل عالفلوس ؟ إلمن راح تاخذها ؟ لقبرك ؟
السيستاني صار يبجي : آآآآه لو تعرف يا رقوبي .. آني عندي أيتام أصرف عليهم .. عندي بس بايران ربع مليون طفل ايراني لقيط من أثر زواج المتعة .. لا أبهاتهم يعترفون بيهم ولا أمهاتهم .. وكل يوم نلاكي كدام باب الحوزة طفل لقيط ملفوف بعباية ايرانية .. ونضطر انه نربيه بالحوزة ونسويه سيد ولما يكبر يتخرج برتبة آية الله العظمى .. واذا هي مرية تصير علوية ولما تكبر تتخرج برتبة زينبية .. بس أتمنى ان يكون هازه سر بيني وبينك !!!
رقوبي : لعد اشلون تكولون انكم سادة من نسل رسول الله ؟؟؟!!!
السيستاني : للزرورة أهكام = ( للضرورة أحكام) ... هسة أنت اشكد جايبلي فلوس ؟؟؟!!!
رقوبي : خمس ملايين دولار .. هذولة مالوت الانتخابات .. نريد منك خوش فتوة تحث الناس على انتخابي !!!
السيستاني : خمس ملايين شنو ؟ أنت تريد تنطيني فلوس جكاير ؟ الخمس ملايين هذولة راح اعتبرها عربون محبة منك إلي أما فلوس الانتخابات فآني آخذ أقل شي عشر ملايين دولار على الفتوة الوحدة !!!
رقوبي : حيييييل .. ليش هيجي غالي ؟؟؟!!!
السيستاني : صدقني .. انه علمودك هذا المبلغ لأن الأمريكان يدعموك .. الله وكيلك المالكي عرض علي خمسطعش مليون دولار ورفضت لأنه انتهى دوره والأمريكان هسة ما يريدوه ومثل ما كلتلك عشر ملايين دولار .. يعني آني خسران علمودك خمس ملايين دولار !!!
رقوبي : اذن اتفقنا على عشر ملايين دولار ..نشفطها من دم العراقيين وننطيها لولاد الحرام بايران !!!
السيستاني : اتفقنا هبيبي رقوبي !!!
رقوبي : بس الله خليك سيدنا أريدها فتوة تقلب الدنيا .. مو فسوة تجيفنا !!!

معاني المفردات :

شنو انطوك ؟ : ماذا أعطوك ؟

حصة : نصيب

تفيك : تتفلسف أو تجعل نفسك الأفهم بهذا الأمر

يكدر : يقدر أو يستطيع

خمط : سرقة أو الحصول على المال بصورة غير شرعية

نشمي

رقوبي يحكم العراق (الحلقة الخامسة)

رقوبي يحكم العراق

الحلقة الخامسة

علاقة رقوبي وية المخابرات الأمريكية صارت كلش قوية لأن رقوبي يومية جاي يدخل اختبارات ودورات تخص المرحلة القادمة خاصة وانهم جاي يهيؤوه علمود يصير رئيس على العراق فمثلا دخل دورة اسمها (اشلون تغدر بصديقك المخلص وتلعن أبو أسلافه) ودورة لخة اسمها (اشلون تشعل الفتنة بين الحماة والكنة) ودورة لخة بعنوان (تناحر الاخوان في ظل تسامح الأديان) ودورة بعنوان ( اذبحني اليوم وسامحني باجر) وآخر دورة وهي الأهم من وجهة نظر الأمريكان هي (عين الحسود على النعاج قبل الأسود) !!!
ورغم ان رقوبي ما استوعب شي من هاي الدورات لأنه قضاها كلها نوم الا أنه من وجهة نظر الأمريكان كان مهيأ ورسالة مختصرة و خاصة وسرية دزتها المخابرات الأمريكية للقيادة تقول فيها ( المطي جاهز للانطلاق ) !!!
الخطوة الثانية كانت تنص على انه رقوبي ينتقل من السويد للعراق على انه رجل أعمال عراقي مغترب راد يرجع للوطن ويستقر بيه ويسويله شوية مشاريع ومنها شوية شوية يزحف للسلطة عن طريق الانتخابات وقبل ما يسافر رقوبي للعراق دار حديث شيق بينه وبين رئيس المخابرات الأمريكية :
رئيس المخابرات : شوف عيني رقوبي أنت باجر راح تسافر للعراق واحنا خلينا برصيدك فلوس ما تحلم بيها بعمرك كله .. يعني بعرس أمك ما شفت مثلها !!!
رقوبي : هاي حجاية عمي أبو زياد دايما يقولها إلي " بعرس أمك ما شفت مثلها" شنو متفقين وياه علية ؟؟؟
رئيس المخابرات : علمود تعرف انه احنا اشكد نعرف الصغيرة والجبيرة عن أي شخص وانه احنا مو سهلين !!!
رقوبي : لعد شنو اسم أخوية (نوشي) الحقيقي ؟؟؟ لو أنتو صدك جهاز مخابرات قوي كوللي اسمه الحقيقي !!!
رئيس المخابرات : هو هذا مو اسمه الحقيقي ؟؟؟ ألا يا مطاية .. صدك آني مشغل مطاية وياية بجهاز المخابرات الأمريكية .. اذا اسم أخوك الحقيقي ما يعرفوه !!!
رقوبي : لعد وجايين تفيكون براسي واحنا سي آي ايه .. وما تفوتنا فوتة ..
رئيس المخابرات : على ساس أنت اشلون ذكي هسة ؟؟؟ جمالة جاي تحرجنا .. صخام الصخمني يوم ما اشتغلت بالمخابرات الأمريكية لأني أنجبر أقابل مثل شكولتك التعبانة !!!
رقوبي : زين أنت كلت انه انتو حاطين بحسابي فلوس .. اشكد يعني ؟؟؟ ترى أقل من تلاث تالاف دولار ما أقبل !!!
رئيس المخابرات : شوف هذا شنو يكول ؟؟؟ تلاث تالاف دولار؟؟؟ شنو دازيك لبنغلادش ؟؟؟ ولك احنا حاطين بحسابك ملايين ..
رقوبي : نفس الشي .. اذا هي ملايين الدنانير العراقية همينة تصير نفس القيمة .. شنو ما تعرف انه الدينار العراقي واكعة قيمته ورجاءا دنانير عراقية ما أريد أريد يا دولار أمريكي لو يورو أوروبي ..
رئيس المخابرات : يا ول أنت أثول ؟؟؟ احنا حاطين بحسابك ملايين الدولارات و..
رقوبي بذهول : وروحها لأمك ؟؟؟ ملايين الدولارات ؟؟؟ يعني هسة أروح للكيولية بقلب من حديد ومحد راح يكتلني هناك ؟؟؟
رئيس المخابرات : منو هذولة الكيولية ؟؟؟ وليش يكتلوك ؟؟؟
رقوبي : جمالة أنت تشتغل بجهاز مخابرات كلش قوي وما تعرف شنو يعني كيولية .. ولكم طحتوا من عيني .. حبيبي الكيولية هذولة الغجر مالوت العراق .. الواحد يروح عدهم علمود يتونس ويرتاح بس اللي ما عنده فلوس يشبعوه بسط وكتل* .. الله وكيلك عليهم جلاليق* تخلي الواحد يورم جعبه* لمدة اسبوع كامل !!!
رئيس المخابرات مع ابتسامة خفيفة : لعد أنت بهيجي حالة شابع كتل وجلاليق من عدهم وآني أكول ليش جعبك ممسوح ها ها ها ها !!!
رقوبي : أكوللك ؟؟؟ .. خاف السوسيال* هنا بالسويد بس يعرف انه عندي بالحساب فلوس راح يكطع معاشي ؟؟؟!!!
رئيس المخابرات : أي أثول البين* .. هو اللي عنده حساب بالملايين الدولارات راح يحتاج بعد سوسيال لو شؤون اجتماعية ؟؟؟!!!
رقوبي : لأ .. رجاءا هاي رزقة أولادي لا تكطعها عنهم .. هذولة مثل اليتامى كلش فقرة !!!
رئيس المخابرات : يابا راح نكول للسوسيال هنا انهم ما يكطعوها .. زين هيج ؟؟؟!!!
رقوبي : حتى مساعدة الأطفال من التأمينات ما أريد يكطعوها .. واريدهم يصرفولي همينة فلوس كرت باص .. مو تنسى !!!
رئيس المخابرات : ولك أنت غير جلدة .. اسمعني زين .. هسة عوفك من الشغلات الفطيرة وخلينا بالأهم .. أنت لازم أول ما تروح للعراق تروح كبل على آية الله العظمى السيد علي السيستاني وسع الله مخرجه وتنطيه الخمس .. يعني لو تنطيه كم مليون دولار لأنه السيستاني راح يفيدك هواية في المرحلة الجاية !!!
رقوبي : حييييييل الخمس عند السيستاني هي كم مليون دولار.. انهجم أبو بيتك* رقوبي .. لعد هذا اشكد دا يخمط من العالم ؟؟؟!!!
رئيس المخابرات : لعد أنت شعبالك ؟؟؟ بابا .. هذا السيستاني كلمته مثل السيف على هواية من العراقيين .. لو يكوللهم ذبوا نفسكم بالشط كلها تذب نفسها وهي الممنونة .. لعد ليش احنا نستخدمه موعلمود نمرر كل ملاعيبنا من خلاله .. لا وجمالة هواية يقلدوه !!!
رقوبي : هسة هذا العجمي* كلمته مثل السيف على هواية من العراقيين ؟؟؟ وهمينة يقلدوه ؟ شنو مطاية *؟ ما يفتهمون ؟؟؟!!!
رئيس المخابرات : وأنت لازم هيجي تصير همينة مطي علمود توصل للي تريده .. خاصة ان السيستاني راح يخلي العالم كلها تمشي وراك وتنتخبك .. بس ها ؟ اذا طلب منك زيادة انطيه ولا تخلي أحد غيرك يزيد عليك .. ترى اللكامة* هواية وكلها راح تنافسك بهالمجال !!!
رقوبي : مو خاف يخلصون الفلوس اللي حاطينها بحسابي وكلها تروح ببخت السيستاني ؟؟؟!!!
رئيس المخابرات : لا تخاف احنا ندفع لك كل فلس يروح من عندك .. ونخصمها من بترول العراق .. اشبيك صافن ؟ بشنو تفكر؟ مو عادتك تفكر ؟؟؟!!!
رقوبي : والله صافن على بترول العراق .. عفية هيجي بترول دا يتحمل هيجي نفقات واحنا مو عارفين اشلون جاية تضبط معاكم .. نفقات حرب ؟ و نفقات المؤامرات ؟ ونفقات السيد السيستاني ؟ وزين انه الحرامية اللي بالحكومة جاي تلاكي شي تبوكه .. هذا غير البوك مالكم .. ما تكوللي شنو بقى للشعب ؟؟؟!!!
رقوبي خلى رئيس المخابرات يصفن .. ولا تعليق !!!

معاني المفردات :

بسط وكتل : ضرب

جلاليق : جمع جلاق وهو الشلوت أو ضرب الشخص على خلفيته بواسطة القدم

جعبه : خلفيته

السوسيال : الشؤون الاجتماعية التي تدفع للشخص معيشته اذا لم يتوفر لديه عمل

أثول البين :هي مسبة تعبر عن الانزعاج من الشخص

انهجم بيتك : انخرب بيتك

عجمي : العجم الايرانيين

مطاية : حمير

اللكامة : من له شراهة في الأكل والمقصود بها اللصوص والمتملقين

نشمي

رقوبي يحكم العراق (الحلقة الرابعة)

رقوبي يحكم العراق

الحلقة الرابعة

طلع رقوبي من المخابرات وهو مصدوم ومثل اللي مو مصدق نفسه وصار يحجي وية نفسه ويقول : صدك ..جذب* آني أصير رئيس على العراق ؟؟؟ الجماعة أكيد ما دا يتشاقون* لأن كلامهم وياية بيه جدية وقرار الجنسية هذا بإيدي دليل على اللي يكولوه .. خليني أروح لعمي أبو زياد وأحجيله اللي صار .. عمي هذا مفتح باللبن* مثلي ويفهمها وهي طايرة .. لعد ليش يكولون ثلثين الولد على خاله ؟ ليش ما يكولون ثلثين الولد على ابن أخوه ؟؟؟!!!
وصل رقوبي لبيت عمه أبو زياد وهناك دك الباب
أبو زياد : منو ؟؟؟
رقوبي : عمي افتح الباب أريدك بشغلة كلش ضرورية !!!
أبو زياد : هذا أنت ؟ أخرى بالساعة* اللي جبتك بيها للسويد !!!
رقوبي : عمي افتح رحمة لوالديك !!!
أبو زياد : أكيد عندك طلب تريدني أمليلك اياه .. ولك صارلك ثمان سنوات بالسويد ولهسة ما كادر تملي طلب .. هذا لو زمال* جان من زمان تعلم سويدي وصار يحجي مثل البلبل !!!
رقوبي : عمي الله يخليك تريدني أصير زمال وأحجي مثل البلبل .. اشلون صارت هاي ؟؟؟
أبو زياد ما تحمل وشاط من الغضب وفتح الباب ، ورقوبي كبل هجم على أبو زياد وصار يبوس بيه !!!
أبو زياد : ولك تظل طول عمرك لوكي .. تعال ادخل أشوف شنو عندك !!!
رقوبي دخل جوة وكعد كبل على القنفة وخلى رجل على رجل وشعل جكارة وقال : عمي .. خلاص ترى راح نحكم العراق ويصير بايديننا !!!
أبو زياد يباوع رقوبي من فوق لجوة وموعاجبه كلامه ..
رقوبي : عمي شوف هذا قرار الجنسية !!!
أبو زياد : ولك صدك هذا قرار جنسية بس شنو علاقته بالخرابيط اللي جاي تحجي بيها ؟؟؟
رقوبي سرد لعمه أبو زياد القصة كلها وشنو دار بينه وبين المخابرات
أبو زياد باوع رقوبي واندهش على القصة وقال : ابن أخوية .. حبيبي أنت .. أنت ابن الغالي .. أنت ابن اخوية الحجي خالد اللي أعزه من أخوتي كلها .. أنت السد العالي .. أنت الجبل الاخضر .. أنت ..
رقوبي صار يحجي وية نفسه : أشو عمي صار مثلي صاير يبيع لواكة* براسي .. أشو قبل شوية راد يطردني من بيته !!!
أبو زياد : بس أنت بهيجي حالة راح تحتاج لمساعد الك يعينك على أمور الدولة .. ترى الشغلة مو سهلة مثل ما تتصور !!!
رقوبي : علمود هيجي عمي آني أريدك تساعدني !!!
أبو زياد : آني ممكن أساعدك اذا خليتني رئيس المخابرات العراقية .. الله وكيلك ما راح أخلي واحد يمسك بكلمة !!!
رقوبي : ايه عمي واللي ما يعجبنا تطكه بالدهن* !!!
أبو زياد يحجي وية نفسه : وأول واحد راح أطكه بالدهن هو عبد العظيم وأخوه شهاب .. والله لأعدمهم وأعلكهم همة وعشيرتهم !!!
رقوبي : عمي اشرايك تعدم عبد العظيم وشهاب ونخلص منهم لأن عبد العظيم يطالبني 5 تالاف كرونة وأريد آكلهن عليه .
أبو زياد : ولكم مو أكوللكم ان القلوب سواجي* ؟ ها أهه .. آني وابن اخوية نفكر نفس التفكير .. والله آني خفت انه يتعاطف وية عبد العظيم ويخليه وزير الرياضة والشباب .. بس الحمدلله طلع رقوبي مخلص ومو متعاطف وية عبد العظيم وزياراته لبيت عبد العظيم كانت "تقية" .. عفية بابن أخوية هيجي أريدك !!!
رقوبي : ابن اخوية شنو .. لازم من هسة تكوللي سيدي الرئيس والا ما ألزمك المخابرات وأخليك بس مسؤول مال نظافة سوق الشورجة !!!
أبو زياد : ولك أنت أول ما شطح نطح* .. عود صير أول شي رئيس وبعدين نكوللك سيدي الرئيس .. مو هسة أنت بعدك طرك النعال وتريدنا نناديك بأسامي كلش جبيرة !!!
رقوبي : أكوللك .. طارق !!!
أبو زياد : طارق شنو ؟ طول عمرك تكوللي عمي .. شنو ماكو احترام ؟ وبعدين آني رئيس المخابرات اشلون تكوللي طارق هيج بس ؟؟؟
رقوبي : هو صدام حسين مو كان ينادي طارق عزيز ويكوله طارق .. شنو آني وحد ؟؟؟
أبو زياد : ولك أبو ضرطة .. جاي تسوي نفسك مثل صدام حسين .. هذا القائد العظيم ..
رقوبي : عمي رحمة لوالديك اسكت ليسمعوك هسة الأمريكان وبدل ما يخلوني رئيس على العراق تطير رقبتنا ويصير اسمي رقوبي تك رقبة !!!
أبو زياد : زين ما علينا هسة .. أنت مو المخابرات كالولك لازم ترشح واحد من جماعتك يكون حماية إلك ؟ ليش ما تخلي ابني نونو حماية إلك ؟؟؟!!!
رقوبي : يا نونو يا بطيخ هو من اسمه مبين عليه خواف وما يكدر يدافع عن نفسه .. وبعدين شنو أقول للناس ؟ اللي جاي يحميني نونو !!!
أبو زياد : ولك هذا نونو بطل السويد بالتيكواندو وعنده حزام أسود !!!
رقوبي : على ساس انه السويد اشلون زلم بيها .. هو الواحد ما تعرف هو بنت لو ولد .. ابنك نونو يكيش* عند السويديين بس عند العراقيين ما يكيش ويطكوه بالدهن مثل الورد .. آني انطيت اسم وسام علمود يكون حماية إلي !!!
أبو زياد : وسام القمرجي ؟؟؟ انت عاقل ؟ مجنون ؟ هذا ماكو مكينة قمار بالسويد ما يعرفها .. وبعدين تعال أنت تكول وسام اشكبرها بحلكك .. على ساس انه وسام هو السبع ويكيش عند العراقيين ؟؟؟
رقوبي : والله يا عمي هذا اختيار السي آي إيه ولازم نحترم اختيارهم !!!
أبو زياد : اذا كان اختيارهم همة فلازم نحترم رغبتهم .. وسام ابو شوارب خوش ولد ويستاهل لولا هالكم ألف عيب اللي بيه وأول عيب بيه انه "لويسي" من جماعة عبدالعظيم وشهاب !!!
رقوبي : عمي لاتنسى انه وسام راح يصير كلبنا وممكن نحرضه على عبد العظيم وشهاب واللي يسألنا نقول انه الشغلة بيناتهم همة ولاد عم وينجازون لبعضهم!!!
أبو زياد : ها ؟ أشو صرت تفكر ؟؟؟!!!
رقوبي : عمي .. لعد همة من اختاروني علمود أصير رئيس على العراق اعتباطا كانت المسألة ؟ لو همة يعرفون كلش زين انه احنا بأمور الشر ماكو أشطر من عدنا خاصة اذا نريد نذبح بعضنا البعض !!!

معاني المفردات:

صدك جذب؟ : أهي حقيقة أم خيال ؟

يتشاقون: يمزحون

مفتح باللبن: شديد الفهم والادراك

كلش : جدا

أخرى بالساعة اللي جبتك بيها للسويد : كانت ساعة شؤم عندما أتيت بك للسويد

زمال : حمار

لوكي : متملق

يباوع : ينظر

لواكة : وهي تأتي من كلمة لوكي (متملق)

تطكه بالدهن : أي تزيحه عن طريقك بعمل مصيبة له

القلوب سواجي : القلوب عند بعضها تشعر بنفس الشعور

أول ما شطح نطح : بدأ يظهر قدراته مع أنه لازال في البداية

يكيش : القدرة على السباحة في المياه العميقة وهي تستخدم بمواجهة الصعاب والقدرة على مواجهتها

نشمي

رقوبي يحكم العراق (الحلقة الثالثة)

رقوبي يحكم العراق
(الحلقة الثالثة )

مشى رقوبي لمركز الشرطة والحجاب اللي اشتراه من البقال الايراني بجيبه ،وقبل ما يدخل انفتح الباب أوتوماتيكيا وهناك قال رقوبي : بركاتك يا سيد باقر الحسيني .. خليت الباب ينفتحلي من وحده !!!
وقبل ما رقوبي يروح لموظفة الاستقبال اجت موظفة الاستخبارات وكانت كلش حلوة وقالت لرقوبي مع ابتسامة خفيفة : أنت رقوبي تك باب ؟
رقوبي منبهر بجمالها : هاااااااا ؟؟؟!!!
رقوبي يحجي وية نفسه : والله الحجاب صار يشتغل خوش شغل .. وحدة حلوة جمالة بمركز الشرطة .. والله لعبتها هسة وية النسوان .. بركاتك يا سيد باقر الحسيني !!!
موظفة المخابرات وكان اسمها هيلينا : اسمي هيلينا !!!
رقوبي : وآني رقوبي المشهور بـ" تك باب" .. أنت جاية تنسقين وياية* ؟؟؟!!!
هيلينا : آني موظفة المخابرات المركزية !!!
رقوبي : والله عبالي* جاية تريدين تصادقيني ؟ طلعتي موظفة مخابرات ؟؟؟!!!
رقوبي يحجي وية نفسه : اشبيك سيد باقر مو جنت ماشي عدل ؟؟؟!!!
هيلينا : اتفضل وياية من هنا .
رقوبي صار يمشي ورا موظفة المخابرات من دهلوس لدهلوس وعينه ما انشالت عنها وكان يتمنى أن الحجاب يجيبله وحدة مثل هاي بس ما تشتغل بالمخابرات .. وصار كل شوية رقوبي يقول : بركاتك سيد باقر الحسيني .. أروح لك فدوة سيد باقر الحسيني !!!
دخل رقوبي مع موظفة المخابرات لغرفة كان بيها اثنين من موظفين المخابرات واحد منهم يتكلم عربي ويترجم للباقين ، وأول شي سووه لرقوبي هو انهم انطوه قرار الجنسية السويدية علمود يكون مقدمة للعرض اللي راح يعرضوه على رقوبي !!!
رقوبي : هاي شنو الورقة ؟ شنو بيها ؟
موظف المخابرات : معقولة ما تعرف شنو هاي ؟ هاي الورقة اللي ذبحت نفسك عليها وصرت تلبس أشكال وألوان علمود تحصل عليها واللي انطيت بناسك وأهلك بس علمود تشم ريحتها .. هاي قرار الجنسية السويدية احنا قررنا ننطيك اياها !!!
رقوبي طلع الحجاب من جيبه وصار يبوس بيه : صدك ؟ جذب ؟ معقولة ؟ هذا ولا سحر يسوي هيج .. بركاتك يا سيد باقر الحسيني .. أنت وينك من زمان يا سيد باقر الحسيني !!!
موظفين المخابرات صاروا يضحكون ويتغامزون ببيناتهم لأن سيد باقر الحسيني قبل يومين كانوا يحققون وياه بتهم تحرش جنسي ونصب واحتيال وتزوير !!!
موظف المخابرات : أنت تعرف أنه قرار الجنسية مو بهاي السهولة ننطيه لأحد لأنه يشترط النظافة و..
رقوبي : والله آني كلش نظيف حتى الاسبوع اللي فات تسبحت وغسلت أسناني ، حتى جواريبي غسلتهن بالزاهي* مال المواعين !!!
موظف المخابرات : احنا نقصد نظافة السيرة و..
رقوبي : والله سيارتي كلش نظيفة لساتني مشتريها وغاسلها عند طارق الميكانيكي و..
موظف المخابرات : احنا نقصد نظافة التاريخ و..
رقوبي : آني عندي كتاب تاريخ واحد .. عمي أبو زياد نساه عندي وغلست عليه* ، صحيح آني مو قاريه بس دايما أحافظ على نظافته وأوخر الغبار عنه و..
موظف المخابرات : ترى والله راح تجيبلي جلطة .. رحمة لوالديك افهم شنو أقول ولا تصير غبي !!!
رقوبي : يا معود .. ترى آني أفهمها وهي طايرة مو عبالك شكلي هيج مال واحد غبي ومرعبل .. ترى ياما ناس شكلهم هيج وهمة ملعبين ومفتحين باللبن* !!!
موظف المخابرات : لعد فتح باللبن شوية وياية رحمة لوالديك !!!
رقوبي : أفتح بلبننا لو بلبنكم لأنه لبننا بيه حموضة والذبان زارب بيه والجراثيم تشع منه ومعششة جواه ومنطيته طعم كلش طيب مو مثل لبنكم اللي ما بيه ريحة وعبالك جاي تشرب صمغ !!!
هيلينا : الله يخليك عوفنا من اللبن هسة وخلينا بالمهم .. أقدم لك زميلي بالمخابرات الأمريكية جورج !!!
رقوبي : شيصيرلك جورج وسوف ؟؟؟
جورج : حبيبي آني أشتغل بالمخابرات الأمريكية مو بالملاهي اللبنانية !!!
رقوبي : عااااااااا ؟؟؟ يعني أنت أمريكي ؟؟؟!!!
جورج : لعد أفغاني ؟ .. شوف حبيبي رقوبي .. أنت تعرف أنه احنا الأمريكان بالاضافة مع أصدقائنا من جميع دول العالم نحاول انه نقضي على قوى الشر المتمثلة بالارهاب و..
رقوبي : رحمة لوالديك شنو يعني "ارهاب" ؟؟؟!!!
جورج يقول لهيلينا : صاحبكم هذا مبين عليه كلش مطفي !!!
جورج : حبيبي رقوبي .. تحب تكون متعاون ويانة علمود نقضي على الأشرار في العالم ؟ لا تنسى انه احنا نداري أصدقائنا ونخصصلهم مستحقات كلش ضخمة !!!
رقوبي : يا معود لو تريدني أقضي على كل الأشرار اللي بالسويد ترى ما عندي مانع !!!
هيلينا : لا يا عيوني مو بالسويد .. نريدك تقضي على الأشرار اللي بالعراق !!!
رقوبي : وعلمود عيونج أقضي على الأشرار والاخيار همينة وأصمط أبو أبوهم !!!
جورج : أنت هسة تعجبني وعلمود هيج راح نخليك عميل للسي آي ايه برتبة رئيس عرفاء وممكن اذا الأمر يتطور نخليك رئيس على العراق !!!
رقوبي : لا يابا لا ؟ وروحها لأمك ؟ أنت تحجي صدك لو تتشاقى وياية ؟ مرة وحدة رئيس للعراق ؟
رقوبي طلع الحجاب من جيبه وصار يباوع بيه
جورج وهيلينا وموظف المخابرات الثالث كلها بلسان واحد : نعرف شنو تريد تكول ... بركاااااااااتك يا سيد باقر الحسيني !!!

معاني المفردات :

تنسيق وياية : تحاولين التنسيق لمصادقتي

عبالي : كنت أعتقد

الزاهي : مسحوق غسيل الصحون

غلست عليه : تعمدت اخفاؤه ومصادرته

ملعبين ومفتحين باللبن: شطار ودواهي ومدركين للأمور

نشمي

رقوبي يحكم العراق (الحلقة الثانية)

رقوبي يحكم العراق
(الحلقة الثانية)

المشهد رقوبي وهو كاعد على التواليت ودا يشرب جكارة وجاي يؤلف قصيدة مطلعها :
حبيبي ياللي شكلك ورد
دكلي رنة وقبل ما تسد أرد
لو تشم ريحتي تلاكيها ورد
ولو تريد مني بوسة
أنطيك بوسات من حلك قرد
ولو تريد مني فلوس
أدز لك من خراي طرد
وهناك انتهى رقوبي من مهمته الجبارة ولبس ملابسه وطلع من التواليت وضميره مرتاح لأنه أنجز المهمة بنجاح تام !!!
وهسة صارت الساعة 12 الظهر وهو وقت الريوك بس المشكلة انه زوجته في المدرسة ونست تجهزله الريوك المعتاد .
رقوبي : عااااووووه هم راح أسوي ريوك لنفسي ؟؟؟!!! العالم تتزوج علمود ترتاح وآني طركاعتي طركاعة .. بس لو أعرف همة اشلون يسوون البيض .. يابا ليش أسوي بيض؟ ترى ما الي خلق .. خليني أتريك جاي وخبز منها أسرع ومنها أوفر .. لعد ليش يكولون علية غبي؟ أشو هاااااا أهة جاي أفكر .. جمالة جاي أفكر بطريقة كلش حضارية وهسة راح أتريك جاي وخبز واذا سألوني راح أكوللهم تريكت باجلا بالدهن .. همة اشمدريهم شنو تريكت .. ترى الحجي ببلاش وخلينا نطير فيالة براسهم .. بس هسة لو أعرف الجاي اشلون يسووه ؟ يابا ليش اشرب جاي ؟ يكولون انه الجاي مضر بالصحة .. لعد خليني آكل بس خبز .. عاااااوووه هسة راح أطلع الخبز من المجمدة ؟ والا أكول ليش آكل خبز ؟ خليني أوفر أحسن .. هو أصلا ليش أتريك ؟ خليني بدون ريوك بلكن أحد يعزمني عنده لو لما المرة تجي من المدرسة تسويلي مركة بانية عالغدا !!!
(التلفون يرن)
رقوبي : هذا منو اللي جاي يدك تلفون من الصبح ؟ هذا أكيد وسام حلمان انه ربح بالقمار ويريدني أفسرله الحلم .. المشعول الصفحة كل مرة يحلم انه ربح ولما يلعب صدك يخسر ودايما يكول هاي آخر مرة وما يجوز ويرجع يلعب مرة اللخ وهسة هو مديون ولو بايده يبيع جهاله جان من زمان سواها .. بس اذا طلب مني فلوس هاي المرة راح ألوطه على حلكه ، خليه بالأول يرجع فلوسي اللي أطالبه وبعدين يحجي !!!
رقوبي وبدون أي مقدمات يرفع سماعة التلفون ويرد على أنه وسام اللي متصل :
شوف ترى سلف ماكو وأكون زمال لو أسلفك مرة اللخ ولازم ترجع فلوسي لو هسة أعلكها عليك وأطيح حظك !!!
مترجم المخابرات : معاك المخابرات السويدية !!!
رقوبي يكوم على حيله من الخوف : ترى والله الحجي مو عليكم .. هذا وسام السيبندي هو اللي ...
مترجم المخابرات : مو مشكلة نعرف أنك ما تسترجي ترد علينا بهالطريقة .. بس احنا نريد نشرب كهوة وياك عدنا هنا بقسم المخابرات .. عدنا سالفة وياك !!!
رقوبي : يا ستار .. هي سوالفكم ما تجي الا وية الكهوة ؟ زين ليش ما تخلوها هنا عندي بالبيت وعلى حسابي وبنفس الوقت نعرفكم على أولادي محمد وصهيب ، ترى الجهال كلش مأدبين و....
مترجم المخابرات : لا .. المقابلة سرية وضرورية نريدك تكون عدنا باجر الساعة عشرة الصبح .
رقوبي : اشدعوة مغبشين هيج ؟ مو آني أصحى من النوم بالـ 12 الظهر !!!
مترجم المخابرات : اشدعوة هيج كسلان ؟ آني أكوللك الأمر ضروري وسري وأنت ولا على بالك ، تجي الساعة عشرة واذا ما تجي راح نتخذ اجراءات ضدك منها أنك تدفع غرامة ألف كرونة !!!
رقوبي : لا يا معود كل شي الا الفلوس .. أجي وغصبن ما علي .. أنتو منو يكدر يكوللكم لا !!!
(انتهت المكالمة)
رقوبي صار يحجي وية نفسه : شيريدون مني ؟ هذيج المرة قابلوني علمود الجنسية وعبالنا راح يصرفوها النا وضربوني بوري غسل ولبس وما انطونا جنسية .. لعد هالمرة شيريدون ؟ خاف العجيزة اللي تحرشت بيها هذاك اليوم قدمت بلاغ ضدي ؟ لا مو معقولة هي جانت سكرانة من وين تعرف منو آني ؟
لو خاف عرفوا اني انطيت جكارة لهذيج البنية لأنها جوة السن القانوني .. مو هذولة ممنوع أحد ينطيهم جكاير وكحول .. خاف أهلها عرفوا وراحوا قدموا بلاغ ضدي وجاي يبيعون شرف براسي ؟ هسة شكوللها لأم محمد .. مو تسكطني لو تطلقني .. أحسن شي أخلي الأمر سكتة وما أخليها تعرف .. مو غير تصمط أبو أبوية !!!
رقوبي ظل طول اليوم صافن ودالغة تجر دالغة ومو عارف اشلون راح يدبرها باجر وية المخابرات .. خاف يتهموه انه جاي يتحرش بالبنية اللي انطاها الجكارة وتنلاص عليه .. والله مشكلة !!!
وبين ما هو جاي يقلب بالتلفزيون طلعتله قناة "اقرأ" وشاف واحد ملتحي جاي ينطي درس بالدين .. وهناك طرت فكرة جهنمية لرقوبي انه يروحلهم وهو لابس ملابس مال واحد متدين .. دشداشة قصيرة وشماخ على الراس بدون عكال مع سبحة نص متر على ساس انه يسبح بيها وخلى مصحف صغير بجيبه الفوكاني على ساس انه يقرأ بيه طبعا ناهيكم انه جاب قشر بيتنجان وصار يفرك بيه على كصته علمود يخلي الكصة يصير لونها أسود تدل على أثر السجود أثناء الصلاة .. رقوبي قال وية نفسه انه هاي أحسن طريقة علمود يبعد عن نفسه الشبهة بأنه يتحرش بالبنات لأنه متدين ويخاف الله ومو مال هيجي شغلات .. وبالاخير قال رقوبي لنفسه : والله راح ألعب بالمخابرات لعب !!!
في اليوم الثاني لبس رقوبي الدشداشة القصيرة وخلى شماخ على راسه وصار يفرك أسنانه بالسواك .. وكل شوية يقول : استغفر الله .. استغفر الله .. حتى اذا شاف وحدة حلوة وظل يباوعها الى أن تختفي يقول بعدها : استغفر الله !!!
مشى رقوبي لمركز الشرطة لأن المقابلة مع المخابرات بالسويد تصير بمراكز الشرطة الرئيسية وقبل ما يوصل لمركز الشرطة قرر رقوبي انه يشتري علك لأن ريحة حلكه جايفة ومو مال واحد متدين ، فدخل محل بقالة صاحبه واحد ايراني وهناك رقوبي سلم وقال : السلام على من اتبع الهدى !!!
البقال الايراني شاف رقوبي واستغرب من هاي الهيئة الغريبة وقال : أنت مو هذيج المرة اجيت واشتريت مجلة خلاعية من عندي؟ شنو اللي غير حالك ؟
رقوبي : والله الظرف صعب يخلي الواحد يفكر ميت الف مرة قبل ما يسوي أي شي !!!
البقال : وشنو اللي خلاك تنقلب مية وثمانين درجة ؟ مو هذيج المرة لما اجيت كنت لابس قميص مال بريكية ولابس نص كيلو ذهب وحاف حواجبك ومسوي شغلات حتى الواحد يستحي يقولها !!!
رقوبي : بيني وبينك ترى هسة عندي مقابلة وية المخابرات وخاف يتهموني بشغلة أخلاقية مالي يد بيها علمود هيج آني مغير شكلي !!!
البقال : شنو المخابرات ما عدها شغلة ولا عملة الا أنت ؟
رقوبي : شنو نسوي احنا الناس المهمة مستهدفة من الكل !!!
( البقال راد يعفط لرقوبي بس استحى )
البقال : على فكرة أنت ينرادلك حجاب من واحد سيد ؟
رقوبي : وشنو يسوي هذا الحجاب ؟
البقال : هذا الحجاب يحميك من الأعداء وينصرك عليهم ويمنع عنك الحسد و..
رقوبي يحجي وية نفسه : هو آني أكبر حسود .. منو يكدر يحسدني ؟
البقال : وأي واحد يريد يسوي شغلة ضدك ترجع عليه وتنقلب ضده ، طبعا هذا غير انه يخليك تعلم الغيب ووتتنبأ ببعض الأمور المستقبلية !!!
رقوبي : هذا صاروخ الحسين ما يسوي هيج !!!
البقال : صدقني واكثر مما تتصور .. أنت بس انوي على الحجاب وآني أوصيلك عليه من الحسينية والسيد آية الله باقر الحسيني هو اللي يسويلك اياه بايده !!!
رقوبي : أكوللك .. هذا آية الله باقر الحسيني مو هذاك اليوم صايديه متحرش بابن الجيران ؟؟؟
البقال : هاي اشاعة .. هذولة الوهابية بس يريدون يشوهون سمعته ترى هذا ابن رسول الله وسره باتع وشغلته كلش مضمونة ورخيصة مو غالية بس 200 كرونة سويدي .. يا بلاش !!!
رقوبي : ايه والله آني بحاجة لهيجي حجاب .. ممكن توصيلي على واحد ؟
البقال : من حسن حظك انه عندي واحد جاهز هسة يالا واصل من السيد !!!
رقوبي : الحكني بيه رحمة لوالديك اللي ما تعرف منو همة !!!
البقال : بس على شرط أنك لازم تؤمن بهذا الحجاب مو بس تستخدمه .
رقوبي : آني أؤمن بكل شي ينفعني ولو تريدني أروح للسيد وأبوس عمامته همينة مستعد .. وبهالحجاب راح أطيح حظ المخابرات وأخليهم يبوسون قندرتي ويتوسلون بية بس علمود ينكفون شري وما أحسدهم !!!

معاني المفردات :
ريوك : ريوق (وجبة الصباح)
طركاعة : مصيبة
المشعول الصفحة : صفة يراد بها السب والتحقير
صدك : حقيقة أو حقيقي
ألوطه على حلكه : أضربه على فمه
زمال : حمار
مرة اللخ : مرة أخرى
حجي : كلام
مغبش : في وقت مبكر من الصباح
هذيج المرة : في المرة السابقة
شماخ : حطة الرأس
نشمي

رقوبي يحكم العراق (الحلقة الأولى)

رقوبي يحكم العراق
(الحلقة الأولى)

(اجتماع على مستوى كبير لموظفي السي آي ايه الأمريكي )
الرئيس : اجتماعنا هذا هو اجتماع مهم جدا يترتب عليه مستقبل منطقة الشرق الأوسط ، ولحماية مصالحنا بهاي المنطقة لازم نضبط خططنا المستقبلية بيها ولازم نوزع الأدوار على عملائنا حكام هاي المناطق بشكل ما يؤثر على آلية عملنا اذا لا سمح الله تغيرت الظروف .
أحد الاعضاء : احنا اجتنا أوامر بعمل تغيير جذري لخريطة منطقة الشرق الأوسط وهذا يترتب عليه تغيير عدد من زعماء و رؤساء الدول !!!
الرئيس : طبعا وعلمود يكون التغيير متناسب مع سياستنا في هاي الدول لازم يكون الاختيار بمواصفات تخدم مصالحنا بالدرجة الأولى وتخلي الأمور تحت سيطرتنا خاصة في العراق لأن مستقبل البترول كله يعتمد على مدى سيطرتنا على البلد و أريد أكوللكم انه المالكي انتهى دوره كعميل ولازم نلاكي عميل آخر يتناسب مع الفترة الجاية .
سكرتير السي آي ايه : وشنو هي المواصفات المطلوبة للعميل الجديد ؟؟؟
أحد الأعضاء : على ما اعتقد انه جرت العادة لاختيار العميل انه يكون ذكي ولماح ويفهم شنو نريد .. يعني يفهمها وهي طايرة وما يغلبنا !!!
الرئيس : اسمحلي أكوللك انه كلامك هالمرة كله خريط في خريط ، اذا نريد نخلي عميل في العراق لازم هالمرة يكون غبي علمود نستفيد من أخطاءه القاتلة!!!
أحد الأعضاء : بس اشلون تصير الأمور اذا ارتكب خطأ ضدنا ؟؟؟
الرئيس : بالعكس احنا نريده يرتكب أكبر عدد من الأخطاء حتى لو ضدنا علمود تكون نقط سودة تنحسب عليه واذا نريد نشيله من الحكم يكون الأمر بغاية السهولة لأنه راح يتحاسب على أخطاءه وما يكولون انه احنا ظلمناهم أو جايين نفرض هيمنتنا عليهم بالعكس يكونون همة الممنونين النا لأنا خلصناهم منه !!!
السكرتير : اذا ممكن تكوللنا على المواصفات لأن الشغلة مبين بيها طبخة جديدة.
الرئيس : لازم يكون مرعبل ، وسيبندي ، ودلخ ، وزايعته الكاع ، وسختجي ، وحسود وأهم شي هاي الحسود علمود يحسد جيرانه ويلعن ابو أسلافهم ولازم يكون همينة كسول ما يحب يتعب نفسه لأن الفترة الجاية تريد عميل مطنش لكل الأمور مجرد ديكور يحكم بلد .. يعني تمبل أبو رطبة !!!
السكرتير : على كيفك سيدي .. ترى أنت تعمقت بالمصطلحات العراقية واحنا مثل ما أنت شايف أمريكان وما نفهم بهاي الكلمات العراقية .
الرئيس : وهذا أكبر خطأ يقع فيه أكبر جهاز استخباراتي في العالم وأنتو علمود تكونون مستعدين لمواجهة الاعداء لازم تتمكنون من لغتهم وعاداتهم وتقاليدهم ، شوفوا آني مثلا هذاك اليوم انعزمت بحفلة تنكرية بهوليوود فاتفقنا آني وكم واحد من جهاز المخابرات الأمريكية انه نسوي لطمية بالحفلة وصرنا نقرأ قرايات مال استشهاد النبي سميث وصرنا نمثل الحالة حتى اللي مثل بدور القاتل شبع نعل من عدنا بهذاك اليوم وصارت كتلته بفلس ، بس ان شالله مأجور .. وعلى فكرة صرنا نطبر ونضرب زناجيل مثل ما بعض العراقيين يسوون وأختكم زوجتي ماريا صارت تسوي خبز العباس بالفانيليا والبيكنغ باودر علمود الطعم يطلع حلو .. الله وكيلكم ما صار خبز العباس لأنه طلع النا من الفرن "توست جورج واشنطن" وآني بدوري صرت أوزع الشربت وصرت أقول "اشرب وزيد والعن يزيد" بس لأنه محد يعرف يزيد صرت أقول "اشرب واسكر والعن هتلر" ها ها ها ها !!!
أحد الأعضاء : زين منو هذا يزيد ؟؟؟!!!
رئيس المخابرات يقول للسكرتير : ذكرني باجر نعاقب هذا العضو .. أريدكم تزينوه صفر واضربوه بالخيزرانة ونكعوه بماي وملح وشربوه غصبن ما عليه لترين خل علمود يعرف انه الله حق .. مو تنسى !!!
السكرتير : ولا يهمك راح أسويلك اياه طرشي !!!
الرئيس : أكوللك .. صدك .. هذا منو يزيد ؟؟؟!!!
السكرتير : على ما أعتقد انه صاحب مطعم باجلا بالدهن أيام الأمويين وهو اللي اكتشف شغلة الهريسة !!!
مستشار المخابرات : سيدي كلام زميلي السكرتير كله غلط لأن يزيد هذا كان رئيس المخابرات مال الدولة الأموية علمود هيج همة يلعنوه !!!
الرئيس يقول للسكرتير: ألا يا سيبندي أنت هم جلدك يحكك ، يزيد طلع زميل وآني ما أدري وجمالة جاي أسب بيه مثل ما بعض العراقيين يسوون ، بس معقولة يكون رئيس مخابرات والناس تسب بيه ، هذا يعني ان الشعب الأمريكي راح يسبون بية وبجهاز المخابرات الأمريكي اذا الأمور ما مشت مثل ما نريد .. معقولة ؟؟؟ لعد بقية دول العالم شراح يسوون بينا لو العراقيين شراح يسد حلكهم علينا ؟؟؟ شنو هالكابوس ؟؟؟!!!
مستشار المخابرات : نصيحتي الك سيدي أنك تسوي حجاب عند (شيخ قمر) ببغداد !!!
الرئيس : والله هم فكرة جيدة راح أخليها على جدول الأعمال .. هسة خلونا بموضوعنا الرئيسي أحسن .. طبعا آني اجتني تقارير عن كل الشخصيات العراقية اللي بيها هاي المواصفات و المنتخبة لحكم العراق من العراقيين الموجودين في جميع دول العالم سواءا مقيمين في العراق أو خارج العراق يعني مثلا بسوريا فيه 18 عراقي بيهم هاي المواصفات وبمصر فيه 3 عراقيين وبموزمبيق فيه 6 عراقيين وبالولايات المتحدة فيه 9 عراقيين وبالصومال فيه 5 عراقيين وبالهند فيه 8 عراقيين وبالسويد فيه شخص واحد و..
السكرتير : معقولة في السويد شخص واحد بس؟؟؟!!! .. ترى التقارير تقول انه الجالية العراقية أكبر ثاني جالية في السويد وانت تكوللي شخص واحد بس فيه هاي المواصفات ؟؟؟!!!
الرئيس : يا ول لا تصير خبل أنت بلسانك كلت انه اللي بيه هاي المواصفات بس يعني مو مواصفات ثانية وهذا الشخص حسب تقارير المخابرات السويدية انه الوحيد اللي بيه هاي الصفات اللي ذكرتها سابقا ، وعلى ما اعتقد انه مرشح قوي لهذا المنصب حتى ان اسمه .. رقوبي الملقب بـ " تك باب " !!!
عضو المخابرات : والله هذا الاسم مو غريب علي .. ايه هسة اتذكرت آني لما كنت منتدب في السويد في قسم المخابرات السويدية قابلت هذا الشخص وحققت معاه .. أنت تعرف انه مبنى التجارة العالمي في نيويورك هو السبب في انهيارها في 11 سبتمبر ؟؟؟
الرئيس : اشلون .. واحنا عارفين منو اللي سواها !!!
عضو المخابرات : لو يسمحلي السيد الرئيس أنه أشرح له نوعية الأسلحة اللي يمتلكها هذا اللي اسمه " رقوبي تك باب " !!!
الرئيس : هو يمتلك أسلحة ؟ ترى احنا ما اتفقنا على هيج .. التقارير تكول انه انسان مسالم حتى أم صجمة ما يعرف يستخدمها .. معقولة تقارير السي آي ايه كلها خريط في خريط ؟؟؟
عضو المخابرات : سيدي الرئيس لو تسمحلي وأشرحلك شنو هو السلاح اللي يمتلكه رقوبي جان ما كلت هذا الكلام .
الرئيس : ترى أنت ذبحتني بلغوتك الزايدة .. يا تحجي كبل يا تلم غراضك وترجع تشتغل عربنجي بتكساس مثل قبل !!!
عضو المخابرات : سيدي .. السلاح اللي يمتلكه رقوبي سلاح حارق خارق وهو (عينه الحارة) .. الله وكيلك اذا يريد يحسدك ممكن يحولك لقرد وأنت ما تدري ، وناطحات السحاب مال 11 سبتمبر هو بس شافهن بالتلفزيون قال : " أيبااااااااااه .. اشكد طوال هذني " .. الله وكيلك هو كالها الصبح وبنفس اليوم انهارت !!!
الرئيس : وأنا خوووووووك .. هيجي قابلية عنده ؟؟؟!!!
عضو المخابرات : سيدي .. وأكثر من هذا ترى تاريخه بهيجي أمور حافل وعينه ما شاء الله عليها تصيب لو حتى كان طير في السما .. مو كلتلك يمتلك سلاح خرافي ؟؟؟!!!
الرئيس : هذا عز الطلب .. مرعبل وكسول وحسود .. العراق بعد شيريد أكثر من هيجي حاكم ؟؟؟!!!
سكرتير المخابرات : يعني برايك نختار "رقوبي تك باب" لحكم العراق ؟؟؟
الرئيس : وبامتياز .. هسة لازم نتفق على المسرحية اللي اشلون راح رقوبي يستولي على حكم العراق .. بس أهم شي أنكم لازم تتصلون بيه بطريقتكم الخاصة وتعرضون عليه هذا العرض .. ما أعتقد انه راح يرفض .. وهسة راح نشرب نخب الامبراطور رقوبي تك باب .. وراح نسوي حفلة تنكرية هالليلة ممكن نطبر ونضرب زناجيل على نغمات لطمية اسمها " ارقص جوبي وانتخب رقوبي " !!!

نلاكي : نجد
علمود : لكي
يكول : يقول
مرعبل ، وسيبندي ، ودلخ ، وزايعته الكاع ، وسختجي : مواصفات سيئة لشخص سيء
تمبل أبو رطبة : كسول جدا
قرايات : جمع قراءة وهو ما يقرؤه الشيعة في ذكرى استشهاد الحسين
لطمية : لطم وضرب على الصدر حزنا على مقتل الحسين وهي عادة شيعية
صارت كتلته بفلس : أي ضًرب كثيرا
التطبير : شق الشخص لرأسه بالسيف واحداث جرح تقربا للحسين
ضرب الزناجيل : ضرب الشخص لنفسه بالسلاسل أيضا تقربا للحسين
يزيد : هو يزيد ابن معاوية بن ابي سفيان .. وهو مكروه عند الشيعة لذلك يلعنوه دائما
جمالة : أيضا .. زيادة على ذلك
هسة : الآن
تك باب : ذو باب واحد فقط
هيج : هكذا
جوبي : رقصة شبيهة بالدبكة

نشمي