رقوبي يحكم العراق
الحلقة الرابعة
طلع رقوبي من المخابرات وهو مصدوم ومثل اللي مو مصدق نفسه وصار يحجي وية نفسه ويقول : صدك ..جذب* آني أصير رئيس على العراق ؟؟؟ الجماعة أكيد ما دا يتشاقون* لأن كلامهم وياية بيه جدية وقرار الجنسية هذا بإيدي دليل على اللي يكولوه .. خليني أروح لعمي أبو زياد وأحجيله اللي صار .. عمي هذا مفتح باللبن* مثلي ويفهمها وهي طايرة .. لعد ليش يكولون ثلثين الولد على خاله ؟ ليش ما يكولون ثلثين الولد على ابن أخوه ؟؟؟!!!
وصل رقوبي لبيت عمه أبو زياد وهناك دك الباب
أبو زياد : منو ؟؟؟
رقوبي : عمي افتح الباب أريدك بشغلة كلش ضرورية !!!
أبو زياد : هذا أنت ؟ أخرى بالساعة* اللي جبتك بيها للسويد !!!
رقوبي : عمي افتح رحمة لوالديك !!!
أبو زياد : أكيد عندك طلب تريدني أمليلك اياه .. ولك صارلك ثمان سنوات بالسويد ولهسة ما كادر تملي طلب .. هذا لو زمال* جان من زمان تعلم سويدي وصار يحجي مثل البلبل !!!
رقوبي : عمي الله يخليك تريدني أصير زمال وأحجي مثل البلبل .. اشلون صارت هاي ؟؟؟
أبو زياد ما تحمل وشاط من الغضب وفتح الباب ، ورقوبي كبل هجم على أبو زياد وصار يبوس بيه !!!
أبو زياد : ولك تظل طول عمرك لوكي .. تعال ادخل أشوف شنو عندك !!!
رقوبي دخل جوة وكعد كبل على القنفة وخلى رجل على رجل وشعل جكارة وقال : عمي .. خلاص ترى راح نحكم العراق ويصير بايديننا !!!
أبو زياد يباوع رقوبي من فوق لجوة وموعاجبه كلامه ..
رقوبي : عمي شوف هذا قرار الجنسية !!!
أبو زياد : ولك صدك هذا قرار جنسية بس شنو علاقته بالخرابيط اللي جاي تحجي بيها ؟؟؟
رقوبي سرد لعمه أبو زياد القصة كلها وشنو دار بينه وبين المخابرات
أبو زياد باوع رقوبي واندهش على القصة وقال : ابن أخوية .. حبيبي أنت .. أنت ابن الغالي .. أنت ابن اخوية الحجي خالد اللي أعزه من أخوتي كلها .. أنت السد العالي .. أنت الجبل الاخضر .. أنت ..
رقوبي صار يحجي وية نفسه : أشو عمي صار مثلي صاير يبيع لواكة* براسي .. أشو قبل شوية راد يطردني من بيته !!!
أبو زياد : بس أنت بهيجي حالة راح تحتاج لمساعد الك يعينك على أمور الدولة .. ترى الشغلة مو سهلة مثل ما تتصور !!!
رقوبي : علمود هيجي عمي آني أريدك تساعدني !!!
أبو زياد : آني ممكن أساعدك اذا خليتني رئيس المخابرات العراقية .. الله وكيلك ما راح أخلي واحد يمسك بكلمة !!!
رقوبي : ايه عمي واللي ما يعجبنا تطكه بالدهن* !!!
أبو زياد يحجي وية نفسه : وأول واحد راح أطكه بالدهن هو عبد العظيم وأخوه شهاب .. والله لأعدمهم وأعلكهم همة وعشيرتهم !!!
رقوبي : عمي اشرايك تعدم عبد العظيم وشهاب ونخلص منهم لأن عبد العظيم يطالبني 5 تالاف كرونة وأريد آكلهن عليه .
أبو زياد : ولكم مو أكوللكم ان القلوب سواجي* ؟ ها أهه .. آني وابن اخوية نفكر نفس التفكير .. والله آني خفت انه يتعاطف وية عبد العظيم ويخليه وزير الرياضة والشباب .. بس الحمدلله طلع رقوبي مخلص ومو متعاطف وية عبد العظيم وزياراته لبيت عبد العظيم كانت "تقية" .. عفية بابن أخوية هيجي أريدك !!!
رقوبي : ابن اخوية شنو .. لازم من هسة تكوللي سيدي الرئيس والا ما ألزمك المخابرات وأخليك بس مسؤول مال نظافة سوق الشورجة !!!
أبو زياد : ولك أنت أول ما شطح نطح* .. عود صير أول شي رئيس وبعدين نكوللك سيدي الرئيس .. مو هسة أنت بعدك طرك النعال وتريدنا نناديك بأسامي كلش جبيرة !!!
رقوبي : أكوللك .. طارق !!!
أبو زياد : طارق شنو ؟ طول عمرك تكوللي عمي .. شنو ماكو احترام ؟ وبعدين آني رئيس المخابرات اشلون تكوللي طارق هيج بس ؟؟؟
رقوبي : هو صدام حسين مو كان ينادي طارق عزيز ويكوله طارق .. شنو آني وحد ؟؟؟
أبو زياد : ولك أبو ضرطة .. جاي تسوي نفسك مثل صدام حسين .. هذا القائد العظيم ..
رقوبي : عمي رحمة لوالديك اسكت ليسمعوك هسة الأمريكان وبدل ما يخلوني رئيس على العراق تطير رقبتنا ويصير اسمي رقوبي تك رقبة !!!
أبو زياد : زين ما علينا هسة .. أنت مو المخابرات كالولك لازم ترشح واحد من جماعتك يكون حماية إلك ؟ ليش ما تخلي ابني نونو حماية إلك ؟؟؟!!!
رقوبي : يا نونو يا بطيخ هو من اسمه مبين عليه خواف وما يكدر يدافع عن نفسه .. وبعدين شنو أقول للناس ؟ اللي جاي يحميني نونو !!!
أبو زياد : ولك هذا نونو بطل السويد بالتيكواندو وعنده حزام أسود !!!
رقوبي : على ساس انه السويد اشلون زلم بيها .. هو الواحد ما تعرف هو بنت لو ولد .. ابنك نونو يكيش* عند السويديين بس عند العراقيين ما يكيش ويطكوه بالدهن مثل الورد .. آني انطيت اسم وسام علمود يكون حماية إلي !!!
أبو زياد : وسام القمرجي ؟؟؟ انت عاقل ؟ مجنون ؟ هذا ماكو مكينة قمار بالسويد ما يعرفها .. وبعدين تعال أنت تكول وسام اشكبرها بحلكك .. على ساس انه وسام هو السبع ويكيش عند العراقيين ؟؟؟
رقوبي : والله يا عمي هذا اختيار السي آي إيه ولازم نحترم اختيارهم !!!
أبو زياد : اذا كان اختيارهم همة فلازم نحترم رغبتهم .. وسام ابو شوارب خوش ولد ويستاهل لولا هالكم ألف عيب اللي بيه وأول عيب بيه انه "لويسي" من جماعة عبدالعظيم وشهاب !!!
رقوبي : عمي لاتنسى انه وسام راح يصير كلبنا وممكن نحرضه على عبد العظيم وشهاب واللي يسألنا نقول انه الشغلة بيناتهم همة ولاد عم وينجازون لبعضهم!!!
أبو زياد : ها ؟ أشو صرت تفكر ؟؟؟!!!
رقوبي : عمي .. لعد همة من اختاروني علمود أصير رئيس على العراق اعتباطا كانت المسألة ؟ لو همة يعرفون كلش زين انه احنا بأمور الشر ماكو أشطر من عدنا خاصة اذا نريد نذبح بعضنا البعض !!!
معاني المفردات:
صدك جذب؟ : أهي حقيقة أم خيال ؟
يتشاقون: يمزحون
مفتح باللبن: شديد الفهم والادراك
كلش : جدا
أخرى بالساعة اللي جبتك بيها للسويد : كانت ساعة شؤم عندما أتيت بك للسويد
زمال : حمار
لوكي : متملق
يباوع : ينظر
لواكة : وهي تأتي من كلمة لوكي (متملق)
تطكه بالدهن : أي تزيحه عن طريقك بعمل مصيبة له
القلوب سواجي : القلوب عند بعضها تشعر بنفس الشعور
أول ما شطح نطح : بدأ يظهر قدراته مع أنه لازال في البداية
يكيش : القدرة على السباحة في المياه العميقة وهي تستخدم بمواجهة الصعاب والقدرة على مواجهتها
نشمي
0 التعليقات:
إرسال تعليق