رقوبي يحكم العراق
الحلقة الثامنة
استلم رقوبي الحكم في العراق وعين كرئيس للجمهورية وأول شي سواه رقوبي لدعم الديمقراطية واعتبرها هدية للشعب العراقي هو جملة اعدامات في حق مجموعة من العراقيين كانت (مضوجة) فخامته وأول واحد تم اعدامه هو محسوبكم العبد الفقير لله نشمي لأنه كان دائما يشهر برقوبي ويكتب عليه مقالات ويؤلف عليه قصص وطبعا كل واحد مضوج رقوبي يأمر رقوبي باعدامه الى أن وصلت الحالة بأن صار الاعدام عند رقوبي مثل الزلاطة وأمر الاعدام صار يتخذه بكل سهولة والعالم صارت كلها تصف نظام رقوبي بالدموي وكل هذا يتم طبقا للسياسة الكلش ديمقراطية .. ويكولون ان رقوبي صارت حياته كلها ديمقراطية .. يتريك ديمقراطية ويتغدى ديمقراطية ويتعشى خفايف سندويشات ديمقراطية مع قوطية ديمقراطية لزوم الهضم .. بس يا ويل ويله اللي يعارض ديمقراطية رقوبي مو لشي بس فخامته ما يحب انه أحد يعكر عليه النظام الديمقراطي اللي بناه بكفاح ونضال سنين طويلة قضاها فخامته بنوم طويل الأمد !!!
يكولون ان رقوبي راد يربي أولاده حمودي وصهيب تربية صالحة بعيدة عن العنف .. تعالوا وياية نعيش هذا المشهد اللي يعكس حكمة عظيمة راد رقوبي ينقلها لأولاده :
رقوبي يحجي وية أولاده حمودي وصهيب : ولدي .. آني جمعتكم اليوم علمود أعلمكم حكمة راح تفيدكم طول عمركم ومن خلالها راح تقدمون أكبر خدمة انسانية للشعب العراقي !!!
حمودي : ليش بابا أنت راح تموت ؟؟؟
صهيب : لا ولك شنو أنت تفاول على أبونا .. بابا يمكن هو مريض وجاي يخرف وما دا يدري شنو يكول !!!
رقوبي : ألا يا أدب سزية .. واحد يريد يموتني وواحد يريد يسويني مريض ومخرف .. آني ربيتكم هيج ؟؟؟
حمودي : ايه بابا أنت ربيتنا هيج .. مو أنت اللي دايما تجذب على الناس وتكوللهكم انه آني راح أوفرلكم الأمن والأمان وانه راح أقضي على الفساد وراح أخلي العراق تصير بيه كهرباء وان الماي راح يتوفر بغزارة بكل بيت عراقي وجمالة ماي نظيف مو وصخ وانه راح أخلي الدينار العراقي يصعد سعره لـ ...
رقوبي : بس بابا .. هذا الكلام منو علمك اياه ترى كله مغالطات لأنه ماكو واحد مثلي عطوف على العراقيين .. بس لو أعرف منو هذا اللي علمك هيجي حجي بالله الكريم لأعلكه وأعدمه كدام الناس كلها هو وأهله وأخليه عبرة لكل العراقيين !!!
صهيب : بابا .. أنت اشلون تكول أنك عطوف على العراقيين وجاي تعدم بيهم؟؟؟!!!
رقوبي : وليدي سؤالك هذا كلش عجبني .. شوف راح أضرب لك مثل حي على سؤالك أنت وأخوك هالجربان .. هسة هاي ثلاث كواني وكل كونية فيها مجموعة فيران في قمة نشاطها .. تعال أنت يا حمودي وحاول تطلع من الكونية الأولى بايدك فار فار بدون ما يهرب منك ولا فار !!!
حاول حمودي يطلع الفيران واحد واحد وكدر يطلع فارين من أصل عشرة والثمانية الباقيات هربن من الكونية لأن الفيران سريعة وصعب السيطرة عليها !!!
رقوبي : هسة أنت دورك يا صهيب تعال وطلع الفيران واحد واحد من الكونية من غير ما يهرب منك ولا فار !!!
صهيب حاول أنه يكون أسبع من حمودي وكدر يطلع ثلاث فيران من أصل عشرة والسبعة الباقيات هربن منه !!!
رقوبي : شوفوا انتو ما كدرتوا تسيطرون على الفيران وكلهن هربن من عدكم بس آني هسة راح أعلمكم اشلون تسيطرون عليها وراح أطلع من الكونية الثالثة واحد واحد من غير ما يهرب مني ولا فار !!!
أخذ رقوبي الكونية الثالثة وصار يفرها بالهوا عدة فرات علمود يدوخ الفيران وفعلا الفيران داخت وصارت مو كادرة تهرب وكدر رقوبي انه يسيطر عليها ويطلعها من الكونية فار ورا فار من غير ما يهرب منه ولا فار لأنها مثل ما كلنالكم دايخات وما تكدر تهرب !!!
رقوبي : ولادي شفتوا اشلون آني سيطرت على الفيران وطلعتهن واحد واحد من غير ما يهرب ولا فار .. وهذا نفس الشي وية الشعب العراقي اذا ما تدوخه وتشغله بأمور حياته لا يمكن تسيطر عليه , وأفضل طريقة هي أنك تدوخه بأمور حياته بأبسط مستلزماته .. امنع عنه الكهرباء وامنع عنه الماي النظيف وامنع عنه الأمن والأمان وامنع عنه بنزين السيارات وامنع عنه الحصة التموينية والنتيجة انه يدوخ ويسير من السهل السيطرة عليه لأنك دا تكفخه على راسه بطريقة غير مباشرة !!!
حمودي : بابا .. أنت شنو تستفيد من هذا كله خو انطي للشعب اللي يريده وخلص نفسك !!!
رقوبي : آني هواية زعلان عليك وليدي لأنك دا تفكر بطريقة مال واحد أثول .. هذولة العراقيين اذا تنطيهم عين راح ياكلوك وما راح تكيش معاهم .. أنت تعرف شنو راح يصير اذا وفرتلهم كل هاي الأمور ؟ راح يطالبوك بأشياء أكبر من هاي وراح يتدخلون بطريقة حكمك للشعب وراح يحاسبوك عالفلس وراح يجبروك أنك تنقاد إلهم وما راح يخلوك تتنفس ولاراح يخلوك تحول لحسابك بسويسرا ولا فلس .. وبالأخير يطكوك بالدهن ويتخلصون من عندك وتصير مو خوش وراح ينشروك عالحبل ويطلعون كل فضايحك .. ولك هذولة العراقيين ما ينعطون وجه وخليك هيج أحسن كل ما واحد بيهم يرفع راسه اكفخه عليه !!!
صهيب : والله يا بوية راح العن لك والديهم وراح أصمط أبو أبوهم !!!
حمودي : ولا يهمك بوية .. راح أخليهم يمشون ويتلفتون حواليهم من الخوف واللي يكول ليش راح أوريه شي ما شافه طول عمره !!!
رقوبي : عفية ولدي .. هيج أريدكم .. ديمقراطيين للنخاع .. الحمدلله اللي خلاني أربي ولادي تربية صالحة بعيدة عن الانحراف .. وبهاي المناسبة راح أصلي ركعتين شكر لله وأدعو ربي انه يحفظ لي هالولاد ويصيرهم لخدمة الوطن !!!
(التلفون يرن)
رقوبي : ألو ؟ منو ؟ شكو ؟
وسام بعد ما استلم الحماية الشخصية لرقوبي : سيدي .. السيارة جاهزة لنقلك لقصر النوم !!!
رقوبي : ايه والله صارلي ساعة كاملة ما نمت أروح أنام لأنه بعد النوم عندي جلسة نوم استعدادا ليوم النوم العالمي !!!
انطلق موكب الريس رقوبي من القصر الرئيسي لقصر النوم وفي نص الطريق انحصر رقوبي وشعر انه بحاجة يروح للتواليت وهناك قال للسايق رحمة لأبوك أوكف هنا ترى راح أسويها على نفسي .. اليوم ماكل مركة بانية ويظهر اجة وقت الـ... !!!
السايق : سيدي .. بس هنا ماكو تواليتات علمود تسويها !!!
رقوبي : يا معود ترى راح أسويها على نفسي وأخزيكم .. ايه أوكف هنا راح أروح ورا التلة هاي وهناك أسويها !!!
السايق أشر لبقية سيارات الموكب انه هنا نريد نوكف .. وهناك السيارات كلها وكفت .. وراح رقوبي ورا التلة بس شوية بعيد وسواها على شكل علامة استفهام وأثناء ما كان يسويها كان يغني (جنة يا وطننا) .. وبعد ما انتهى رقوبي من الـمهمة الجبارة رجع على الموكب وكانت المفاجأة انه الموكب اتعرض لعملية اغتيال جماعي وطبعا الهدف كان معروف وهو محاولة اغتيال رقوبي .. رقوبي حس انه ذهابه للتواليت كانت بمثابة انقاذ إله من محاولة الاغتيال فرجع رقوبي مكان ما سواها وقال لعلامة الاستفهام : منين أبوسج منين ؟؟؟!!!
أجهزة المخابرات كانت كلش صاحية .. وأبو زياد بعد ما استلم المخابرات حب انه يطور جهاز المخابرات علمود يثبت لرقوبي انه صاحي ومو نايم فأعلن انه عبد العظيم عدوه اللدود هو ورا عملية الاغتيال فألقى القبض على عبد العظيم وهنا تنتهي حلقتنا ونشوفكم في الحلقة القادمة علمود نشوف شنو راح يصير بعبد العظيم ؟؟؟!!!
نشمي
0 التعليقات:
إرسال تعليق