رقوبي يحكم العراق
(الحلقة الثالثة )
(الحلقة الثالثة )
وقبل ما رقوبي يروح لموظفة الاستقبال اجت موظفة الاستخبارات وكانت كلش حلوة وقالت لرقوبي مع ابتسامة خفيفة : أنت رقوبي تك باب ؟
رقوبي منبهر بجمالها : هاااااااا ؟؟؟!!!
رقوبي يحجي وية نفسه : والله الحجاب صار يشتغل خوش شغل .. وحدة حلوة جمالة بمركز الشرطة .. والله لعبتها هسة وية النسوان .. بركاتك يا سيد باقر الحسيني !!!
موظفة المخابرات وكان اسمها هيلينا : اسمي هيلينا !!!
رقوبي : وآني رقوبي المشهور بـ" تك باب" .. أنت جاية تنسقين وياية* ؟؟؟!!!
هيلينا : آني موظفة المخابرات المركزية !!!
رقوبي : والله عبالي* جاية تريدين تصادقيني ؟ طلعتي موظفة مخابرات ؟؟؟!!!
رقوبي يحجي وية نفسه : اشبيك سيد باقر مو جنت ماشي عدل ؟؟؟!!!
هيلينا : اتفضل وياية من هنا .
رقوبي صار يمشي ورا موظفة المخابرات من دهلوس لدهلوس وعينه ما انشالت عنها وكان يتمنى أن الحجاب يجيبله وحدة مثل هاي بس ما تشتغل بالمخابرات .. وصار كل شوية رقوبي يقول : بركاتك سيد باقر الحسيني .. أروح لك فدوة سيد باقر الحسيني !!!
دخل رقوبي مع موظفة المخابرات لغرفة كان بيها اثنين من موظفين المخابرات واحد منهم يتكلم عربي ويترجم للباقين ، وأول شي سووه لرقوبي هو انهم انطوه قرار الجنسية السويدية علمود يكون مقدمة للعرض اللي راح يعرضوه على رقوبي !!!
رقوبي : هاي شنو الورقة ؟ شنو بيها ؟
موظف المخابرات : معقولة ما تعرف شنو هاي ؟ هاي الورقة اللي ذبحت نفسك عليها وصرت تلبس أشكال وألوان علمود تحصل عليها واللي انطيت بناسك وأهلك بس علمود تشم ريحتها .. هاي قرار الجنسية السويدية احنا قررنا ننطيك اياها !!!
رقوبي طلع الحجاب من جيبه وصار يبوس بيه : صدك ؟ جذب ؟ معقولة ؟ هذا ولا سحر يسوي هيج .. بركاتك يا سيد باقر الحسيني .. أنت وينك من زمان يا سيد باقر الحسيني !!!
موظفين المخابرات صاروا يضحكون ويتغامزون ببيناتهم لأن سيد باقر الحسيني قبل يومين كانوا يحققون وياه بتهم تحرش جنسي ونصب واحتيال وتزوير !!!
موظف المخابرات : أنت تعرف أنه قرار الجنسية مو بهاي السهولة ننطيه لأحد لأنه يشترط النظافة و..
رقوبي : والله آني كلش نظيف حتى الاسبوع اللي فات تسبحت وغسلت أسناني ، حتى جواريبي غسلتهن بالزاهي* مال المواعين !!!
موظف المخابرات : احنا نقصد نظافة السيرة و..
رقوبي : والله سيارتي كلش نظيفة لساتني مشتريها وغاسلها عند طارق الميكانيكي و..
موظف المخابرات : احنا نقصد نظافة التاريخ و..
رقوبي : آني عندي كتاب تاريخ واحد .. عمي أبو زياد نساه عندي وغلست عليه* ، صحيح آني مو قاريه بس دايما أحافظ على نظافته وأوخر الغبار عنه و..
موظف المخابرات : ترى والله راح تجيبلي جلطة .. رحمة لوالديك افهم شنو أقول ولا تصير غبي !!!
رقوبي : يا معود .. ترى آني أفهمها وهي طايرة مو عبالك شكلي هيج مال واحد غبي ومرعبل .. ترى ياما ناس شكلهم هيج وهمة ملعبين ومفتحين باللبن* !!!
موظف المخابرات : لعد فتح باللبن شوية وياية رحمة لوالديك !!!
رقوبي : أفتح بلبننا لو بلبنكم لأنه لبننا بيه حموضة والذبان زارب بيه والجراثيم تشع منه ومعششة جواه ومنطيته طعم كلش طيب مو مثل لبنكم اللي ما بيه ريحة وعبالك جاي تشرب صمغ !!!
هيلينا : الله يخليك عوفنا من اللبن هسة وخلينا بالمهم .. أقدم لك زميلي بالمخابرات الأمريكية جورج !!!
رقوبي : شيصيرلك جورج وسوف ؟؟؟
جورج : حبيبي آني أشتغل بالمخابرات الأمريكية مو بالملاهي اللبنانية !!!
رقوبي : عااااااااا ؟؟؟ يعني أنت أمريكي ؟؟؟!!!
جورج : لعد أفغاني ؟ .. شوف حبيبي رقوبي .. أنت تعرف أنه احنا الأمريكان بالاضافة مع أصدقائنا من جميع دول العالم نحاول انه نقضي على قوى الشر المتمثلة بالارهاب و..
رقوبي : رحمة لوالديك شنو يعني "ارهاب" ؟؟؟!!!
جورج يقول لهيلينا : صاحبكم هذا مبين عليه كلش مطفي !!!
جورج : حبيبي رقوبي .. تحب تكون متعاون ويانة علمود نقضي على الأشرار في العالم ؟ لا تنسى انه احنا نداري أصدقائنا ونخصصلهم مستحقات كلش ضخمة !!!
رقوبي : يا معود لو تريدني أقضي على كل الأشرار اللي بالسويد ترى ما عندي مانع !!!
هيلينا : لا يا عيوني مو بالسويد .. نريدك تقضي على الأشرار اللي بالعراق !!!
رقوبي : وعلمود عيونج أقضي على الأشرار والاخيار همينة وأصمط أبو أبوهم !!!
جورج : أنت هسة تعجبني وعلمود هيج راح نخليك عميل للسي آي ايه برتبة رئيس عرفاء وممكن اذا الأمر يتطور نخليك رئيس على العراق !!!
رقوبي : لا يابا لا ؟ وروحها لأمك ؟ أنت تحجي صدك لو تتشاقى وياية ؟ مرة وحدة رئيس للعراق ؟
رقوبي طلع الحجاب من جيبه وصار يباوع بيه
جورج وهيلينا وموظف المخابرات الثالث كلها بلسان واحد : نعرف شنو تريد تكول ... بركاااااااااتك يا سيد باقر الحسيني !!!
معاني المفردات :
تنسيق وياية : تحاولين التنسيق لمصادقتي
عبالي : كنت أعتقد
الزاهي : مسحوق غسيل الصحون
غلست عليه : تعمدت اخفاؤه ومصادرته
ملعبين ومفتحين باللبن: شطار ودواهي ومدركين للأمور
نشمي
0 التعليقات:
إرسال تعليق