لويس أخو لويسا (الحلقة الثامنة والأخيرة)

لويس أخو لويسا
(الحلقة الثامنة والأخيرة )



اتفق خليف مع لويس انه يكوم بارشاده للجماعات المسلحة بقصد القيام لويس بعمل لقاء صحفي مع هاي الجماعات بس حقيقة الأمر تقول شي لاخ بأن لويس يريد ان يندل مواقع المقاومة العراقية علمود يرشد القوات الأمريكية عليهم ويتم القضاء على المقاومة العراقية بشكل جذري .
الموعد كان باجر الصبح ولويس بدوره كام واتصل بأخته لويسا المسؤولة عن هاي المهمة وطبعا لويسا بدورها بلغت القيادة الأمريكية بأن الأمور على ما يرام وان الهدف تحت العناية المركزة !!!
القيادة الأمريكية بدورها بلغت السي آي ايه الأمريكي بأن الفأر دخل المصيدة وانه الغد ستبدأ ساعة الصفر لعملية ( بوز الثعلب ) ... والسي آي ايه الأمريكي أرسل لمركز الأقمار الصناعية بضرورة مراقبة الهدف خليف وتتبع خطواته .. وشي طبيعي انه تكوم الأقمار الصناعية الأمريكية بمراقبة خليف وين ما يروح وهو راكب المطي حتى يقولون ان خليف لما اجة يصلي العشا كانت الأقمار الصناعية تراقب حركاته أثناء الصلاة فكان التقرير الأمريكي على حركات خليف اللي ما عرفوا الأمريكان شدا يسوي خليف وشنو هاي الحركات الغريبة اللي دا يكوم بيها فمثلا لما استعد خليف للصلاة وكبر قال التقرير ان الهدف خليف رفع ايدينه لفوق ربما كان يريد اعطاء اشارة للارهابيين !!!
ولما ركع خليف ذكر التقرير ان الهدف خليف يستعد للهجوم على هدف مجهول .. ولما كام خليف من الركوع ذكر التقرير ان الهدف خليف تراجع عن الهجوم في آخر لحظة .. ولما سجد خليف ذكر التقرير ان الهدف خليف يريد التخفي من شيء ما .. ولما خلص خليف من الصلاة وركب المطي مالته مرة اللخ ذكر التقرير ان الهدف خليف انتهى من المهمة .. والشيء الغريب ان التقرير ما ذكر نوع المهمة اللي كان يكوم بيها خليف وان المهمة "مجهولة الهوية" !!!
عملية (بوز الثعلب) كان يتابعها الرئيس الأمريكي جورج بوش شخصيا مع كونداليزا رايس ..
بوش : كونداليزا .. أريد منك الاشراف شخصيا على هاي المهمة لأنها راح ترشدنا على الارهابيين اللي دوخونا سنين ومو عارفين نوصل لخيط واحد يدلينا عليهم ..
كونداليزا : سيدي الرئيس .. احنا دا نراقب الهدف (خليف) من فترة وآني متأكدة انه هاي المرة راح نقضي على الارهابيين وراح نمحيهم من الوجود بـ(بوز الثعلب) ..
بوش : هل تعتقدين يا كونداليزا انه هالمرة صدك راح نقضي عليهم وراح نرتاح من دوختهم ؟ ترى آني ضجت من هالوضعية الكسيفة وآني بس أريد أخرج من هذا المستنقع .. رحمة لأبوج رايس القمرجي خلصيني من هالورطة .. أريدها من هالشارب !!!
كونداليزا : شارب شنو ؟ مو شايف ملكة جمال كدامك ؟
بوش : أوه .. آسف كوندا .. تذكرت أبوج القمرجي السكير اللي جان يدور الأكل من الزبل وينافس البزازين على عظام السمك ها ها ها ها
كونداليزا تحجي وية نفسها : آني ما أعرف هذا اشلون صار رئيس الولايات المتحدة .. هم غبي وهم سخيف .. طيح الله حظك !!!
في اليوم الثاني .. استعد لويس لمقابلة خليف وقبل ما يطلع من مكان اقامته اتصل لويس بلويسا واتفقوا على الخطة اللي راح تمكنهم من القبض على عناصر المقاومة العراقية .. في البداية يطلع لويس مع خليف وبعدين تكوم لويسا مع عدد ضخم من القوات الأمريكية بمراقبتهم ثم الهجوم على وكر المسلحين ، مشى لويس مسافة طويلة مع خليف الى أن تعب لويس ..
لويس : الله يخليك خليف ما تكوللي وين رايحين هاي احنا لو رايحين للقمر جان هسة وصلنا ، جمالة أرضكم كلش حارة ومو مال واحد يمشي بيها .
خليف : انت مو تريد أدليك على المقاومة العراقية ؟ لعد تحسب ان المقاومة العراقية راح تقابلها بالكهوة مثلا لو بالسوق مو لازم يكونون بمكان بعيد عن الأنظار ؟
لويس : ايه بس آني ظنيت انهم قريبين من هنا .. لعد همة اشلون يمشون كل هاي المسافات ويضربون القوات الأمريكية ويرجعون مرة اللخ لمكانهم من غير ما حتى يتعبون ؟ مو غريبة ؟
خليف : يا معود احنا زلمنا خشنة مو مثل زملكم اللي عبالك زلم هراط .
لويس : شنو يعني هراط ؟
خليف : هراط هذا واحد من شيوخنا مشغل عنده وين ماكو واحد معاق لو سكط ويخليهم يسووله الكهوة لو الجاي والأشياء البسيطة علمود هيج يقولون زلم هراط كلهم ما بيهم خير !!!
لويس : هيج احنا الأمريكان بنظركم ؟ مثل زلم هراط ؟
خليف : وأكثر لأن زلم هراط على الأقل الله خالقهم هيج بس انتو هيجي انتو مسوين بنفسكم لا خلقة ولا أخلاق !!!
لويس : الله يخليك خليف امشي شوية شوية تراني تعبت من المشي .
خليف خلاص احنا قربنا نوصل .. شوف آني راح أمشي كدامك بمسافة خاف يشوفوك وياية وبعدين يحسبوك خاطفني وتنلاص عليك خليني أستأذنهم وبعدين أنطيك اشارة .
لويس : أوكي خليف !
مشى لويس ورا خليف بمسافة وفجأة خليف انطى للويس اشارة بأنه يتقدم ولويس مثل ما هو متفق مع القوات الأمريكية اللي بقيادة أخته لويسا بأن الأمور كلها .. أوكي!!!
لويس بدأ يستعد للانضمام لصفوف القوات الأمريكية علمود يهجمون على أوكار المقاومة العراقية بس فجأة وبدون أي مقدمات اشتغلت النار على القوات الأمريكية وقذائف مدافع الهاون دا تقصف القوات الأمريكية من غير ما يعرف الأمريكان من وين دا يجي هذا القصف العنيف عليهم والأمريكان بدل ما يكونون في موضع هجوم صاروا حتى ما يعرفون اشلون يدافعون عن نفسهم وطشار الأمريكان صار ماله والي وجثث الجنود الأمريكان القتلى كل ما لها تزيد ومشكلة القوات الأمريكية انها دا تواجه عدو مجهول غير مرئي لدرجة ان البعض ظن ان هذا هجوم من القوات (الجنية) مو البشرية وان المقاومة العراقية متحالفة وية الجن والعفاريت والأشباح .. وآخر لحظة من هاي المعركة كانت سقوط قذيفة بالقرب من لويس وبعدها ما عرف لويس شنو صار !!!
بعد شهر كامل .. صحا لويس من غيبوبته وياريته ما صحا لان لويس اكتشف انه بدون ايدين ولا رجلين وانه غير قادر على الكلام .. لويس تم اعادته للولايات المتحدة وخبر مقتل أخته لويسا استقبله لويس بصيحة قوية كان بوده يلطم بس للأسف لويس ما عنده لا ايدين ولا رجلين علمود يلطم بيهن .. وانبهر لويس أكثر لما عرف ان خليف كان أحد أفراد المقاومة العراقية وبدل ما لويس يخدع خليف كان خليف هو اللي ناصب كمين للويس وللقوات الأمريكية طبعا مع الاتفاق مع أبطال المقاومة العراقية ساعتها عرف لويس ان هذولة العراقيين لا يمكن خداعهم بالأكاذيب الأمريكية وأفلام الهليوود !!!
الرئيس الأمريكي بوش مع جميلة الجميلات كونداليزا رايس كانوا في حفلة لتكريم الجنود الأمريكان المعاقين وطبعا لويس كان من ضمن المعاقين اللي لما اجة دوره بتقليده نوط الشجاعة قال الرئيس الأمريكي بوش : ان من دواعي سروري بأن أكرم الجنود الأمريكان الأبطال اللي شاركوا في عملية ( بوز الثعلب ) واللي باسمي أنا شخصيا أعرب عن سعادتي بنجاح هذه العملية والقضاء على الارهابيين اللي حاولوا المساس بسيادة واستقلال الولايات المتحدة !!!
لويس حاول انه يقول ان هذا الشخص كذاب ودجال ومنافق بس للأسف لويس فاقد حاسة النطق فكانت كلماته تطلع عبارة عن صرخات غير مفهومة .. الرئيس الامريكي هو الوحيد مع كونداليزا رايس كانوا يفهمون شنو يقصد لويس بهاي الصرخات فبادرت كونداليزا رايس وقالت : آني أعرف مدى سعادة لويس .. أعرف انه يريد يهلهل أو يقول اهزوجة أمريكية تعلمها في العراق ها ها ها ها !!!
بوش قرب راسه من لويس وقال : ترى خلينا بحسابك في البنك دولارات ما تحلم بيها و بعرس أمك ما تشوف مثلها .. عاد هسة لازم تنجب وتاكل هوا .. افتهمت !!!
لويس كانت دموعه تنزل من عيونه حزن و ندم .. وبوش أعرب للصحافيين ان دموع لويس هي دموع فرحة النصر !!!
الحكومة الأمريكية خصصت بيت كامل للويس ورصيد في البنك يكفيه طول العمر .. والحقيقة ان الحكومة الأمريكية في غاية الكرم وية جنودها لأن هذا الكرم مصدره اما من سرقة بترول العراق او من دعم دول الخليج للقوات الأمريكية .. يعني مو من جيب الحكومة الأمريكية !!!
وبما ان لويس معاق بدون رجلين وايدين وما عنده قدرة على الكلام كان لازم تخصص الحكومة الأمريكية شخص ممكن انه يكون الوصي على لويس ويساعده ويرعاه فكانت صديقته المخلصة مارغريتا ترعاه وتتصرف بكل فلوس لويس وتلعب بيها لعب طبعا بعدما خصصت للويس غرفة جوة الدرج وخصصت لنفسها غرفة فوق وعلمود تغيظ لويس صارت كل يوم تجيب صاحبها للبيت كدام لويس وعيني عينك .. ولويس يا حبة عيني ما يكدر لا يتكلم ولا يكدر يسوي شي وما عنده سلاح غير دموعه والشي اللي يغيظ لويس أكثر ان مارغريتا بروزت صورة خليف وية لويس اللي أخذوها بالعراق وهو يلوح بأصابعه من ورا راس لويس مثل أذان المطي ولويس من القهر صار يردد وية نفسه قصيدة تعلمها من ديوانية شعراء النبط من حبايبه الكويتيين :
يالله يا خالق الانساني
ياللي كرمت بني آدم بالعقل واللساني
وخليت الطمع يلعب بنفس البشر طول الزماني
وخليتني بالحسرة أتمنى الموت ندماني
أقول بحروف من ذهب للجنود الأمريكاني
لا تركض ورا سراب وتظل طول عمرك عطشاني
تراك تهرول عبث مثل الذيب و الكلب الجرباني
ولا تمشي ورا كذبة دفعوا فيها أغلى الأثماني
وتعيش طول عمرك مخدوع مذموم وجعاني
أدعي على اللي باعونا بأرخص الأثماني
وأخص بالذكر بوش النذل الخسيس الجباني
وكل من والاه بكل زمان و مكاني
وسلامتكم
(تمت السالفة)

نشمي