لويس أخو لويسا (الحلقة الخامسة)

لويس أخو لويسا
(الحلقة الخامسة)

اشتدت أعصاب لويس خاصة بعد ما انقطعت المخدرات عنه وصار ينتظر الضابط المسؤول يمتى يرجع من اجازته علمود يزوده بالكبسولات .
اليوم هو السبت موعد الحفلة والكل دا يهيأ نفسه للحفلة بس لويس الوحيد اللي مزاجه متعكر لأن الكيف مو متوفر ومحد ينطي سلف كبسولات لأنها نادرة ومرغوبة بشدة عند الجنود الأمريكان بس فد واحد من الجنود بشر لويس ان الضابط المسؤول راح يرجع اليوم من اجازته بموعد الحفلة وراح ينطي للويس اللي يريده وراح ينعدل مزاجه وية الحفلة لأن مو بس لويس اللي دا ينتظر الضابط المسؤول على المخدرات .. هذولة كل الجنود الأساوش منتظرين الضابط والكل يريد يعدل مزاجه وية الحفلة .
احنا هسة ببداية الحفلة والجيش الأمريكي دا يستلم حصته التموينية من المشروبات الكحولية ومكرمة من الرئيس الأمريكي بوش فيه توزيع بيرة نسبة الكحول بيها كلش عالية علمود الجيش الأمريكي ينسى انه في العراق ، وموزع البيرة يملي كلاصات البيرة للجنود ويقول : اشرب وزيد والعن فريد !!!
وطبعا خاف تسألون منو هذا فريد ؟ نقوللكم انه فريد هذا أخو فريدة ماركة البيرة العراقية والأمريكان دا يلعنوه لأن البيرة العراقية فريدة دا تنافس البيرة الأمريكية الأمر اللي يخلي الأمريكان يعتبرون انه فريد انضم لقائمة الارهابيين !!!
بدت الحفلة والمذيع يعلن عن المفاجأة اللي دا ينتظرها الجمهور من ضباط ومجندين وهي رقصة ستربتيز للمجندة اللي حازت على وسام الولايات المتحدة للشرف الأمريكي .. وهناك فجأة انطفت الأنوار وتوجه ضوة مركز على هاي المجندة وهي تبدأ بنزع ملابسها اللي كانت ساترة عليها ، طبعا لويس كان يكرع بالبيرة ويباوع الرقصة حاله حال كل الجنود اللي دا يشجعون الرقاصة على رقصتها المحترمة وفجأة لاحت الأضوية وجه المجندة وهناك انبهر لويس لما شاف المجندة وهي من غير ملابس ، وهناك صاح لويس بأعلى صوته : أختي الحبيبة .. لويسا !!!
صدك والله الدنيا صغيرة لويس قابل أخته لويسا في آخر الدنيا ، والجنود الأمريكان صاروا يباركون للويس لما عرفوا انها أخته .. صحيح هي مصلخة بس هاي الشغلة عند الأمريكان هي غاية الشرف لأن لويسا دا تعبر عن اللي جواها ودا تناضل علمود ترفع معنوايات الجنود الأمريكان الهابطة في العراق ، صحيح هي رقصة ستربتيز بس ما دامها تصب في مصلحة الجيش الأمريكي فهي تستحق عليها وسام شرف من الرئيس الأمريكي نفسه اللي هو والحكومة الأمريكية دا يرقصون ستربتيز كدام العالم كله وما دا يخجلون !!!
التقى لويس بأخته لويسا بعد الحفلة ولويسا من كد ما جمعت دولارات من الحفلة مو عارفة وين توديها وشنو تسوي بيها ، ولويس لما شاف الدولارات عند أخته لويسا صار سكران من غير مشروب وبدأ لويس يؤمن بالمثل اللي يقول : الفلوس تغير النفوس وتجيب أكبر عروس !!!
لويس : صدقيني يا أختي العزيزة لويسا اني مشتاقلج ومفتقدج لدرجة اني حاس اني ضايع بدونج .
(لويس كان يكلم أخته لويسا وعينه على فلوسها)
لويسا بعد ما لاحظت اهتمام لويس بالدولارات : مفهوم .. مفهوم .. آني أقدر اشتياقك الي يا عزيزي لويس .. وأقدر أيضا اهتمامك بالدولارات !!!
لويس : ما أخفي عليج يا لويسا انه آني حاس انه احنا انضربنا بوري بجيتنا للعراق وانه العراقيين راح يستقبلونا بالورود طلع كلام فاضي وما اله معنى وانه العراق هو مغارة علي بابا اللي بيها الكنوز طلع سراب بسراب ، آني مو شايف كدامي غير ناس حاقدين علينا وصحراء فاضية ما بيها شي يستحق التضحية علموده !!!
لويسا أخذت شفطة من المشروب : انت غلطان يا لويس لأن في العراق مثل ما فيه ناس حاقدة علينا وتريد قتلنا همينة فيه ناس مستعدين انهم يتعاونون ويانا ويكافحون علمود يحصلون على رضانا ومستعدين انهم يقدمولنا كل التسهيلات علمود همة همينة يحققون طموحاتهم وأحلامهم ويرعون مصالحهم ، ومن خلال هذولة الناس ممكن انا نحصل على الورود اللي نريدها منهم وببلاش ، أما من ناحية الكنوز يا عزيزي لويس فالعراق كله كنوز بس انت لازم تكون مفتح وتعرف اشلون تحصل على مفتاح الكنز مال علي بابا .
لويس : واشلون أحصل على مفتاح الكنز ؟
لويسا : مثل ما آني حاصلة عليه هسة !
لويس : يعني أرقص ستربتيز مثلك ؟
لويسا : لا تعتقد ان رقص الستربتيز مقتصر على النساء فقط ، تكون غلطان باعتقادك هذا .. شايف هذا الجيش الأمريكي الكبير الضخم ؟ ترى كل منتسبيه يرقصون ستربتيز بس كل واحد يرقص على اللحن الخاص بيه !
لويس: ممكن تفهميني أكثر ؟
لويسا : الأمر كلش بسيط بس يحتاج انك تدرس هذولة الناس وتعرف اشلون همة يفكرون علمود تكدر تقتحم نقاط ضعفهم ، الناس هنا ينقسمون لنصين .. النص الأول نفسه ضعيفة دنية ما يستعصي عليك وهذا يصير مثل الريموت كنترول تكدر توجهه مثل ما تريد خاصة اذا أغريته بالفلوس وتقنعه انك جاي علمود تحققله طموحاته .
لويس : والقسم اللاخ ؟
لويسا : القسم الثاني متمسك بمبادئه صلب من الداخل والخارج وعملية اقتحامه لازم تكون بشكل مدروس أعطيك مثال الناس اللي دا يقاوموننا ويقتلوننا بحجة انهم دا يقاومون احتلال من وجهة نظرهم ، هذولة لازم تعرف الشي اللي يركعه ويخليه يرضخ لكل مطالبك !!!
لويس : واشلون ممكن أخلي انسان صلب وقوي وعنيد انه يتحول الى شخص وديع ممكن التفاهم وياه وممكن انه ينفذ كل طلباتي ؟
لويسا جرت نفس قوي من الجكارة ونفخت بوجه لويس : هدده بشرفه وانك ممكن تقتل أو تغتصب شرفه شوف اشلون راح يتحول لانسان وديع ولطيف .
لويس : أخاف أهدده بشرفه يكوم يصير أعند وأشرس لأن مسألة الشرف حساسة عند هذولة الناس .
لويسا : علمود هيج لازم تدرسه دراسة وافية وتعرف الصغيرة والجبيرة وتكدر تسوي عملية التفاف عليه وهذا يتطلب منك مجهود استخباراتي وشغلك لازم يكون بقمة القذارة مثل السي آي ايه الأمريكي !!!
لويس : زين شنو دخل اللي دا تحجين عنه هسة بشغل الفلوس والكنوز ؟
لويسا : ألا يا مطي .. كل هذا وما افتهمت ؟ انك ذابحتك المخدرات ومو مخليتك تفكر مثل الناس .
لويس : هو اللي يكون بجيش كله يتعاطى مخدرات يكدر يفكر مثل الناس ؟ انت بس دليني على المسؤول عن المخدرات بهالجيش والباقي خليه علي .
لويسا : زين يا عزيزي لويس انت مصر تعرف منو الضابط المسؤول عن توزيع المخدرات ؟
لويس : طبعا مصر على معرفته .
لويسا : آني هو الضابط المسؤول على أمن القاعدة وآني المسؤولة على توزيع المخدرات .. مفاجأة مو ؟
لويس : أختي العزيزة لويسا .. انت صاحبة مواهب متعددة الأمر اللي يخليني أرفع لك القبعة احتراما واجلالا لدورك البطولي .. ضابطة أمن وموزعة مخدرات وراقصة ستربتيز .. شنو هالشرف الرفيع اللي تحظين بيه يا أختي العزيزة ؟ حماك الرب من القتلة والارهابيين والحاقدين ونصرك على العراقيين الأشرار !!!
نشمي